Tuesday, July 15, 2014

WEDNESDAY OF THE 15TH WEEK IN ORDINARY TIME (YEAR A)


MATEO 11:25-27. Unsa may angay natong buhaton aron makasabot sa kabubut-on ug plano sa Dios? Diha sa ebanghelyo gipasalamatan ni Jesus ang iyang Amahan tungod sa pagpadayag niini sa Iyang kaugalingon ngadto sa mga gagmay'ng bata. Ang “gagmay'ng bata” wala magpasabot og mga bag-ong nahimugso kondili mga tawo nga mapaubsanon, o sila nga andam maminaw sa Pulong sa Ginoo. Ang mga maalamon dili man daotan sa mata ni Jesus. Apan iyang gisaway kadtong mga tawo nga nahimong mapahitas-on tungod sa ilang gihuptan nga kahibalo, sama sa mga magtutudlo sa balaod ug sa mga Pariseo. Dili na sila maminaw sa bag-ong pagtulon-an nga gipangtudlo ni Kristo. Busa, bisan unsa kataas ang edukasyon nga atong maangkon, magpabilin unta kitang mapaubsanon ug abli sa kahibalo nga magagikan sa Espiritu sa Ginoo.