MATEO 13:24-30. Unsa man nga puwersa ang naghari
diha sa atong kinabuhi karon – katarong ba o kadaotan? Usa ka titser ang
nagpasabot sa mga batang estudyante kalabot niini. Matod pa niya: “Sa
kasingkasing sa matag tawo adunay duha ka lobo nga kanunay’ng gabugno. Ang usa
ka lobo yawan-on ug daotan – kini ang tigpasiugda og kasamok, kalaog, panag-away,
pagdinumtanay, kasina, ug pagdinaotay. Ang laing lobo maayo ug matarong – kini
maoy tigdasig og kalinaw, pagsinabtanay, pagpinasayloay, pagtinahoray,
paghinatagay ug pagtinabangay.” Unya, usa sa mga estudyante ang nangutana:
“Titser, kinsa man kaha sa duha ka lobo ang magmadaogon diha sa akong
kasingkasing?” Ug ang titser nitubag: “Magdepende ra kana kon kinsa sa duha ka
lobo ang kanunay nimong giatiman ug gipakaon.”
