THURSDAY OF THE 15TH WEEK IN ORDINARY TIME (YEAR A)

MATEO 11:28-30. Unsa may makapagaan sa yugo nga ipapas-an ni Kristo kanato? Una sa tanan, ang yugo ni Kristo sayon ug gaan tungod kay ang nagsugo kanato sa pagpas-an niini malumo man og kasingkasing; dili mapahitas-on ug dili masuk-anon. Ang Dios makasabot sa atong katakos; makamao siyang magpasensya kon kita maglisod; ug andam siya nga motabang kanato sa pagdala sa yugo kon kita mosangpit kaniya. Dugang pa niana, ang yugo ni Kristo sayon ug gaan tungod kay kini ipapas-an man uban sa gugma. Paalagaron kita nga mahigugmaon; pasimbahon kita sa kinasingkasing; ug patabangon kita nga dili mag-apas og bayad. Ang trabaho ug kasugoan nga tumanon uban sa gugma mahimo nga sayon ug gaan. Kon walay gugma, ang tanan lisod ug kapoy nga buhaton.