MATEO 13:1-9. Kinsa man
ang tawo nga makahimo’g daghang maayong buhat? Diha sa sambingay sa Tigpugas
atong masabtan nga ang liso, nga mao ang Pulong sa Dios, mabuhi, motubo, ug
mamunga’g daghan kon kini mahagbong sa maayong yuta. Unsa o kinsa man kining
maayong yuta? Ang maayong yuta mao ang tawo nga adunay maayong kasingkasing ug
hunahuna para sa Pulong sa Dios. Andam ug mahinangpon siya kanunay nga modawat
sa Pulong sa Dios isip pagkaon sa iyang kalag. Matag adlaw, mangita siya’g
kahigayonan nga mohunong sa iyang mga buluhaton aron maghilom, magbasa sa
Pulong sa Dios, mag-ampo ug mamalandong niini. Ang Pulong sa Dios adunay
talagsaong gahom, ug ang tawo nga modawat niini sa matag adlaw mamunga gyod og
daghang maayong buhat.
