MATEO 10:7-15. Nganong kinahanglan man kitang
magmanggihatagon? Ang ebanghelyo nag-ingon, “Nakadawat kamo nga walay bayad;
busa, panghatag kamo nga walay bayad.” Sa pagkatinood, ang tanan natong bahandi
– kwarta, talento, abilidad, trabaho, pamilya, ug mga higala – nagagikan sa
Dios, wala pabayri kay kini iyang gasa para kanato. Dili nato kalimtan nga ang
mga bahandi gihatag sa Dios dili aron huptan ug gamiton para sa kaugalingon
lamang kondili aron itabang sa nanginahanglan. Bisan unsa nga matang sa bahandi
ang anaa kanato, angay natong ipaambit sa uban aron kini modaghan. Ang
Panultihon nag-ingon: “Ang tawo nga manggihatagon mosamot kabahandianon;
samtang ang tawo nga magsigi’g tigum para sa kaugalingon mag-antos sa
kawad-on.”
