MATEO 13:10-17. Unsa man ang mga sambingay ni
Cristo ug unsa man ang katuyoan niini? Sama sa daghang mga magtutudlo sa iyang
panahon, si Jesus nigamit og mga mugbong sugilanon nga maghatag og mga
mahinungdanong pagtulon-an para sa kinabuhi sa tawo. Tungod kay nagsumikad kini
sa ordinaryong kinabuhi ug panghitabo sa kinaiyahan ug katilingban, dali ra
kining masabtan. Gitawag kini sila’g sambingay (parable sa Ingles), nga
nagagikan sa Griegong pulong “paraballein” nga nagpasabot og pagtandi. Kon ang
mga sambingay dali rang masabtan, nganong wala man masabti sa mga Pariseo ug
mga magtutudlo sa Balaod ang mensahe ni Kristo? Kini tungod sa ilang garbo, nga
maoy nakadaot sa ilang maayong panabot. Aduna silay mga mata apan dili
makakita; aduna silay dalunggan apan dili makadungog.
