MATEO 13:54-58. Sayon ba ang
pagdala sa mensahe sa Dios ngadto sa uban? Basi sa kasinatian, ang pagpasabot
og tawo sa kamatuoran o kaha sa kabubut-on sa Dios lisod kaayo nga buhaton.
Adunay magpabungol-bungol, adunay pilosopo, ug adunay magbiay-biay kanato.
Bisan gani diha sa atong pamilya, posible nga adunay sakop nga gahi og ulo ug
dili nato madala ngadto sa Ginoo. Gani, daghang mga ginikanan ang masakitan
pag-ayo tungod niini. Apan bisan tuod malisod, dili nato angay’ng talikdan ang
atong kaakohan isip mga propeta sa Dios alang sa uban. Diha sa ebanghelyo, si
Jesus mismo nakasinati og pagsalikway ug pagtamay gikan sa iyang katawhan ug
kaparyentihan. Apan bisan pa niini, nagpadayon siya sa pagtuman sa misyon nga gisangon
kaniya sa iyang Amahan: ang pagdala sa mga tawo ngadto sa kamatuoran.
