Lukas
2:41-51. Nganong gasunod man ang kapistahan sa Sagrado nga Kasingkasing ni
Jesus ug sa Putli nga kasingkasing ni Maria? Ang kasingkasing sa usa ka inahan
konektado sa kasingkasing sa iyang anak. Kon malipay ang anak, malipay usab
kaayo ang inahan. Apan kon maguol o masakitan ang anak, dili usab matukib ang
kasakit nga pagabati-on sa inahan. Mao kini ang kasinatian ni Maria. Sa iyang
pagka-inahan, nahimo siyang kabahin sa tibuok kinabuhi ni Cristo, ilabina didto
sa kalbaryo diin ang iyang anak gisakit ug gipatay sa krus. Maingon nato nga si
Maria mao ang pinaka-unang disipulo ni Cristo. Gawas ni Cristo, si Maria ang
pinakamasinugtanon sa tanang mga anak sa Dios. Tungod niini, angayan lamang nga
pasidunggan sa Simbahan ang kasingkasing ni Maria uban sa kasingkasing ni Jesus.
