Karong adlawa atong gipasidunggan si San Antonio de Padua, nga
pagatawgon usab og San Antonio de Lisbon. Ang Padua usa ka lugar sa Italya diin
si Antonio nagsangyaw sa pulong sa Dios ug namatay. Samtang ang Lisbon mao ang
lugar sa Portugal diin si Antonio nahimugso. Daghang mga tawo ang nagdebosyon
kang San Antonio. Siya ang sangpiton sa mga mawad-ag butang; siya ang duolon sa
mga babaye nga mangita'g pamanhonon; siya ang duolon sa mga magtiayon nga walay
anak; siya ang duolon sa mga mangita'g trabaho; ug siya usab ang patron sa mga viajedor.
Si San Antonio nagpakita sa iya dakong gugma sa Dios pinaagi sa pagsulod
sa monasteryo sa relihiyosong grupo ni San Agustin sa edad nga 15 anyos.
Gibiyaan niya ang kinabuhing hamugaway aron mahimong alagad sa Dios. Nibalhin siya
ngadto sa pundok sa mga Franciscano aron mahimong misyonero sa Morroco uban sa
pagdawat sa posibilidad nga siya mahimong martir. Gipakita niya ang dakong
gugma para sa isig-katawo pinaagi sa pag-alagad sa mga masakiton ug gigutom, paghimong
simple sa iyang mga pagtulun-an aron masabtan sa mga ordinaryong tawo, ug sa pag-inpluwensya
sa gobyerno sa Padua aron maghimog balaod nga molaban sa mga kabos. Sa iyang
kinabuhi, gipakita ni San Antonio nga dili mahimong bulagon ang paghigugma sa
Dios ug sa isigkatawo.
Importante ang panig-ingnan ni San Antonio tungod kay daghan kanato
nagtoo nga igo na ang atong pagsimba kada Dominggo aron ipakita nga kita
nahigugma sa Dios. Daghan kanato dili mobati nga kinahanglan diay pud nga kita
manginlabot sa kaayohan sa atong nasod, sa atong mga silingan, ug sa ubang mga
tawo, ilabi na sa mga kabos. Hinumduman nato ang giingon ni San Juan: “Ang tawo
nga moingon nga siya nahigugma sa Ginoo, apan walay gugma para sa iyang
isigkatawo, usa ka bakakon.”
Si San Antonio namatay sa pangedaron nga 36 anyos. Pinaagi sa
pagdeklara kaniya nga santos, gipakita sa Simbahan nga dili ang katas-on sa
kinabuhi ang importante kondili ang kadak-on sa atong gugma para sa Dios ug sa
isigkatawo.
