Mateo 7:6, 12-14. Sa dalan sa
kinabuhi, unsa may atong pilion, ang sayon o ang lisod? Diha sa ebanghelyo si
Jesus nagtambag kanato sa pagpili sa higpit nga agianan, dili sa luag. Ang duha
ka dalan pareho nga abli ug may kapadulngan. Ang luag nga agianan mao ang
kinabuhi sa katapol, walay kaakohan, kanunay nga lulinghayaw, ug bisyo. Daghang
tawo ang mopili niini. Kon kini nga dalan mao usab ang atong subayon, adto kita
mopadulong sa kangitngit ug sa kamatayon. Sa laing bahin, ang higpit nga
agianan mao ang kinabuhi sa pagtrabaho, pagpanerbisyo, pagpugong, ug
pagdisiplina sa kaugalingon. Gamay lang ang ganahan niini. Apan kon kini nga
dalan maoy atong sundon, ang kahayag ug kinabuhi maoy atong maangkon.
