Mateo 7:15-20. Kinsa man ang usa
ka propeta? Ang propeta mao ang tawo nga magdala og mensahe sa ngalan sa Ginoo.
Pinaagi sa bunyag, matag usa kanato nahimong propeta – adunay bokasyon sa
pagtudlo o pagsangyaw sa mensahe ni Cristo ngadto sa uban. Ang kaakohan sa
pagkapropeta atong matuman diha sa lain-laing kahimtang sa atong kinabuhi. Diha
sa ebanghelyo si Cristo naghisgot mahitungod sa mga mini nga propeta. Kinsa man
kini sila? Sila kadtong magsangyaw sa mensahe sa Dios apan wala magpuyo niini.
Sila ang mga tawo nga maayo lang manudlo o mamadlong, apan ang kinabuhi
hilabihan kasalawayon. Ang tinuod nga propeta mao kadtong mouna sa pagpuyo sa
mga bulawanong mensahe nga ilang gipangtudlo ngadto sa uban.
