Mateo 5:33-37. Maayo ba ang
pagpanaad o pagpanumpa? Para sa usa ka tinuod nga Kristiyano, ang pagpanaad o
pagpanumpa dili na kinahanglang buhaton. Kon aduna kitay gustong himoon o
tumanon nga maayo, buhaton nato kini sa walay daghang propaganda. Ug kon aduna
kitay buot likayan nga daotan, talikdan nato kini sa walay daghang estorya.
Diha sa ebanghelyo si Cristo miingon, “Ingna lamang ‘Oo’ o ‘Dili’, kay kon may
mokapin pa niini, kana gikan na sa yawa.” Nasayod si Jesus nga ang
kamatinud-anon dili masukod sa daghang mga pulong. Basi sa kasinati-an,
kasagarang bakakon maayo kaayo mo-estroya apan dili motuman sa ilang gisaaran
ug gipanumpaan. Apan ang tawong matinud-anon molihok dayon bisan gamay lang ang
gipamulong.
