Mateo 5:13-16. Unsa may papel
sa mga Kristiyano dinhi sa kalibotan? Diha sa ebanghelyo si Jesus migamit og
duha ka hulagway: asin ug kahayag. Usa sa daghang gamit sa asin mao ang paghatag
og kalami sa pagkaon. Sama sa asin, ang mga Kristiyano gilaoman ni Jesus nga
maghimo sa kalibotan nga mas nindot nga puy-an pinaagi sa paghigugma ug
pag-alagad sa usag-usa. Ang kahayag bililhon usab nga elemento sa kalibotan; kon
wala kini, ang mga tawo magkabanggaay, mangahagbong sa kanal, ug dili makaabot
sa ilang padulngan. Sama sa kahayag, ang mga Kristiyano gilaoman ni Jesus nga maghatag
og lamdag sa katilingban pinaagi sa ilang mga maayong panig-ingnan. Ang ilang kinabuhi
maoy magsilbing giya sa uban sa ilang paglakaw padulong sa diosnong gingharian.
