Marcos 12:13-17. Pila man ang
atong ihatag pagbalik sa Dios? Adunay mga tawo nga mohatag sa ikanapulo nga
bahin sa ilang abot ngadto sa Ginoo. Gisunod nila kining tulomanon sa gitudlo sa
Bibliya kalabot sa dyesmos (Tithing). Dalaygon kini nga buhat, ilabina kon kini
ubanan sa malipayong kasingkasing. Apan unsa may atong ikasulti sa mga
binunyagan nga dili mohatag og dyesmos? Ang Simbahang Katoliko wala mag-obliga
sa iyang mga sakop sa paghatag sa ikanapulo nga bahin sa ilang abot. Naa ra
kanato kon pila ang atong ihalad nga inubanan og gugma. Pero, dili maayo kon
kita dili magtagad sa atong katungdanan sa Simbahan. Angay gayod nga makat-on
kita sa paghatag og bahin sa Ginoo pinaagi sa pagsuporta sa Iyang Simbahan ug
sa pagtabang sa mga kabos.
