Lukas 1:57-66, 80. Unsa may pagtulon-an
nga atong makat-onan gikan sa pagkatawo ni San Juan Magbubunyag? Tungod sa
iyang madasigong pagwali ug pagpamunyag, daghan ang nagtoo nga si Juan mao na
ang gipaabot nga Mesiyas? Mahimo ni Juan nga pahimuslan ang sayop nga pagtoo sa
mga tawo para sa iyang mga personal nga interes. Apan, wala niya kini buhata.
Hinoon, miingon siya, “Dili ako ang inyong gipaabot. Adunay mosunod kanako, ug
dili ako takos bisan gani sa paghubo sa iyang sandalyas.” Si Juan maoy tawo nga
dili mapahimuslanon. Miila siya nga adunay Dios, nga maoy tag-iya sa tanan ug maoy
angay'ng pasidunggan. Tungod sa maong pag-ila, si Juan nahimong mapaubsanon ug
matinud-anon diha sa pagtuman sa misyon nga gisangon kaniya sa Labaw'ng
Makagagahum.
