LUKAS 6:39-42. Unsaon man pagtudlo sa mga kabataan og moral nga
kinabuhi? Aron atong magiyahan ang mga kabataan sa hustong dalan, kinahanglang
kita mismo masayod sa moral nga pagtulon-an ug magpuyo niini. Si Kristo
nangutana, “Mahimo ba sa usa ka buta ang pag-agak og laing buta?” Ang tubag
niini dili gayod. Sa samang paagi, ang tawo nga wala mahibalo unsa ang moral
nga pagtulon-an dili makatudlo niini ngadto sa laing tawo. Ug ang tawo nga wala
magpuyo og moral nga kinabuhi dili usab makadasig og laing tawo sa pagkinabuhi
nga matarong. Busa, kini ang dakong hagit alang sa mga ginikanan ug mga
magtutudlo: sabton ang mga pagtulon-an ni Kristo ug puy-an kini sa matag adlaw.
Pinaagi sa atong mga maayong ehemplo, ang mga kabataan mahatagan og saktong
giya sa ilang pagpuyo ning kalibotan.
