LUKAS 6:27-38. Unsaon
man nato paghigugma ang atong kaaway? Ang una natong buhaton mao ang paghatag
og pasaylo. Himoon nato kini bisan kon ang atong kaaway wala mangayo niini. Diha
sa atong kasingkasing ato siyang pasayloon sa daotan nga iyang nahimo. Gawas
niini, mag-ampo kita alang sa iyang kaayohan, dili kaparotan. Atong sundogon si
Hesus nga didto sa krus nag-ampo alang sa kaluwasan sa mga nagpasakit kaniya:
“Amahan ko, pasayloa sila kay wala sila masayod sa ilang gibuhat”. Ang
paghigugma sa kaaway dili sayon nga buhaton. Apan gisugo kini ni Hesus tungod
kay kini makaayo dili lang sa kaaway kondili kanato mismo. Sa pagpasaylo sa
kaaway, kita usab mapasaylo sa Dios. Ug sa pag-ampo alang sa kaaway, malibre
nato ang atong kasingkasing sa kasuko ug pagdumot, ug sa ingon, maato ang
kalinaw ug kalipay.
