LUKAS 4:38-44. Unsa
may angay natong ibalos sa gugma ug kaayo sa Dios? Ang gugma sa Dios libre ug wala
manginahanglan og balos. Ingon niini ang tinuod nga gugma: dili mag-apas og
bayad gikan sa tawo nga gihigugma. Apan bisan tuod og dili magpabalos ang Dios,
dalaygon gihapon para sa usa ka tawo kon siya maghimo og maayo para sa Ginoo.
Diha sa ebanghelyo gihatagan kita og maayong panig-ingnan sa ugangan nga babaye
ni Pedro. Human siya ayoha ni Hesus sa iyang hilanat, nibangon dayon siya ug nisilbi
sa Ginoo ug sa Iyang mga kauban. Ning atong panahon karon, ang mga kabos maoy
nagdala sa presensya sa Dios. Kon gusto kitang magpasalamat sa Dios tungod sa
mga grasya nga atong nadawat, himoon nato kini pinaagi sa pagsilbi sa mga naglisod
ilabina sa mga mahuyang, tigulang, masakiton ug masulob-on.
