LUKAS 7:11-17. Unsa
may angay natong buhaton atubangan sa kalisod ug kagul-anan sa uban? Gikahinagbo
ni Hesus ang mga tawo nga nagdala’g patay’ng lawas sa batan-ong lalaki. Sa
dihang nakita ni Hesus ang inahan sa namatay, natandog pag-ayo ang iyang kahiladman.
Gibati siya’g dakong kalooy tungod kay ang maong babaye byuda, nga sa ato pa,
namatyan na’g bana, unya karon, nawad-an na usab og bugtong anak. Gihikap ni Hesus
ang lungon ug gibanhaw niya ang patay pinaagi sa pag-ingon, “Dong bangon!”
Kining maong hitabo nagpakita kanato sa kinaiya sa Dios, nga buot makighiusa sa
kasakit sa uban ug molihok sa paghatag og kinabuhi ug kaayohan. Kining
ebanghelyo magdasig kanato sa pagpakita’g dakong kalooy sa mga naglisod tang
mga silingan ug sa pagtabang sa ilang kalisdanan.
