LUKAS 6:20-26. Kinsa man ang bulahan nga tawo? Kon makakita kita’g dato, abilidaran, sikat, gwapo o gwapa, dali tang makaingon, “Pagkabulahan nga tawo!” Ang bahandi, talento, dungog ug panagway maoy atong sukdanan sa pagkabulahan. Apan, dili ingon niini ang Kristohanong pagtulon-an. Ang tawo mahimo lamang nga bulahan kon siya magpuyo uban sa Dios. Ang kalinaw, kalipay, kahulogan ug katagbawan dili mapalit og kwarta ug dili usab mahatag gikan sa ubang tawo. Kining mga butanga madawat lamang nato gikan sa Dios. Ang tawo nga mosalig kanunay sa Dios matawag nga bulahan bisan kon siya kabos, gitamay o gilutos tungod kay maiya man ang bahanding langitnon. Apan ang tawo nga walay Dios mahimong alaot bisan kon anaa kaniya ang tanan tungod kay dili man siya makabaton og kinabuhi nga makahuloganon ug malungtaron.
