LUKAS 6:1-5. Nganong importante man ang pagsabot sa katuyoan sa Balaod? Ang mga Pariseo nagbagolbol tungod kay ang mga tinun-an ni Kristo nagtrabaho panahon sa Adlaw’ng Igpapahulay pinaagi sa pagpangutlog mga uhay sa trigo ug pagkusokuso niini sa ilang mga kamot. Agi’g tubag sa maong reklamo, si Hesus nipasabot nga ang kaayohan sa tawo maoy angay’ng ipatigbabaw kaysa balaod. Pananglitan, tungod sa kagutom, si David ug ang iyang mga kauban nikaon sa pan nga hinalad sa templo bisan kon kini supak sa balaod. Kining ebanghelyo magdasig kanato sa pagsabot sa katuyoan sa matag sugo sa Ginoo aron nga dili kita mahisama sa mga Pariseo nga magpugos sa pagpatuman sa balaod bisan kon kini dili na makatabang. Pananglitan, dili nato angay’ng pugson ang tawo sa pagsimba sa Domingo kon siya adunay gibating sakit nga seryoso.
