LUKAS 7:1-10. Unsa
may atong pagbati sa mga tawo nga dili sama kanato’g pagtoo o estado sa
kinabuhi? Diha sa ebanghelyo si Jesus nakadayeg pag-ayo sa usa ka Romanhong
opisyal tungod sa iyang nindot nga batasan. Usa siya ka hentil ug walay pagtoo
sama sa mga Hudiyo, apan aduna siyay dakong pagtahod sa nasod sa Israel ug nagtabang
sa pagtukod og mga balay-ampoanan para sa mga magtotoo. Dugang pa niini, ang
maong opisyal adunahan ug gamhanan, apan nagpakita siya’g talagsaong pagtagad
sa iyang sulugoon. Nangaliyupo siya kang Hesus nga unta ayohon niya ang iyang
katabang nga himalatyon. Kining ebanghelyo magtudlo kanato nga ang Dios malipay
pag-ayo kon kita magpakita’g kaayo sa mga tawo nga lahi kanato’g tinoohan ug
kahimtang. Matag tawo angay natong isipon nga igsoon ubos sa usa ka Amahan nga
atua sa langit.
