Saturday, November 15, 2014

33RD SUNDAY IN ORDINARY TIME (YEAR A)

Prv 31:10-13, 19-20, 30:31; 1 Thes 5:1-6; Mt 25:14-15, 19-21

Ning naghinapos nga mga adlaw sa Liturhikanhong Kalendaryo sa Simbahan, gihatagan kita’g mga sambingay nga adunay kalabotan sa katapusang mga adlaw. Karong Domingoha gisaysayan kita sa sambingay sa mga Talento, diin ang Ginoo gihulagway sa usa ka agalon nga nangayo’g kwentadas sa iyang mga sulugoon sa dihang siya nahibalik gikan sa usa ka paglangyaw. Ang tuyo ning maong sambingay mao ang pagtudlo kanato sa angay'ng buhaton samtang kita magpaabot sa pagbalik sa Ginoo.
Sama sa mga sulugoon diha sa sambingay, ang matag usa kanato gihatagan sa Dios og mga talento para gamiton ug palamboon. Adunay nakadawat og lima; adunay nakadawat og duha; ug aduna usay nakadawat og usa. Ang mga “talento” maoy hulagway sa nagkadaiyang bahandi, kahibalo ug abilidad nga anaa sa mga tawo. Atong masabot nga dili ang gidaghanon sa talento maoy importante kondili ang saktong paggamit sa mga talento nga hinatag sa Dios.
Ang sambingay magdasig kanato sa pagdiskubre unsa ang mga talento nga anaa kanato ug kon unsaon kini paggamit subay sa kabubut-on sa naghatag niini. Ang mga ginikanan adunay dakong papel sa pagtabang sa ilang mga anak nga makakita sa mga talagsaong gasa nga anaa kanila karon. Sila usab ang angay'ng mogiya sa ilang mga anak unsaon paggamit ang mga talento ug kon unsa ang mga maayong katuyoan niini.
Adunay mga “natural” ug “supernatural” talents nga gikan sa Dios. Ang mga natural talents mag-apil sa pagpangisda, pagpananum, pagnegosyo, pagkanta, pagsulti, pagsayaw, ug pagdula. Kini sila maoy maghatag kanato og kusog ug katakos sa pagtrabaho, pagpanginabuhi ug paglingawlingaw. Samtang ang mga supernatural talents mag-apil sa pagtoo, paghigugma ug paglaum, nga maoy magtabang kanato sa pagpalambo sa atong gugma sa Dios ug sa isigkatawo.
Nalipay ang Agalon sa duha ka sulugoon tungod kay napatubo nila sa duha ka pilo ang mga talento nga gibilin kanila. Apan, nasuko siya pag-ayo sa sulugoon nga walay gihimo sa iyang talento gawas sa paglubong niini. Sa samang paagi, ang Dios naglaum og dako nga atong gamiton ang atong mga nagkadaiyang talento. Gidili sa mga anak sa Dios ang pagpasagad ug pagtapol. Kon gamiton nato sa saktong paagi ang atong mga talento, molambo kini ug mapahimuslan; apan, kon dili, masayang kini ug mawala kanato.
Ang unang duha ka sulugoon naningkamot sa pagpatigayon ug pagpalambo sa ilang mga talento ug kini nakalipay sa ilang Agalon. Unsa may makapahimuot sa Dios? Labing siguro malipay pag-ayo ang Dios kon atong gamiton ang atong mga talento para sa Iyang kadungganan ug para sa kaayohan sa Iyang katilingban. Dili maayo nga atong gamiton ang mga talento alang lamang sa atong personal nga kalipay ug panginahanglan. Sa unang sulat ni San Pedro 4:10 kita giawhag: “Matag usa kaninyo kinahanglan nga mogamit sa gasa nga inyong nadawat aron pag-alagad sa uban, isip maayong tigdumala sa grasya sa Dios.”
Usahay, maulaw kita tungod kay gamay lang ang atong mga talento ug gamay lang ang atong mahimo. Apan gipahinumduman kita karon nga ang Dios malipay sa mga gagmay ug ordinaryong butang nga atong mabuhat para Kaniya. Sa unang pagbasa, pananglitan, gidayeg ang usa ka asawa tungod sa iyang simple, ordinaryo ug inadlaw-adlaw nga mga maayong buhat. Labing siguro, mahimuot usab ang Dios sa usa ka panday nga magpaambit sa iyang talento pinaagi sa pag-apil sa apostolado sa pagpanghimo’g balay sa mga kabos; o sa usa ka mag-aawit nga mopaambit sa iyang gasa pinaagi sa pag-apil sa choir sa simbahan; o sa usa ka titser nga mobulantaryo sa pagtudlo’g katesismo; o kaha, sa usa ka magtotoo nga motabang sa mga apostolado sa Simbahan.

Hinaot unta nga sa katapusan sa panahon, makaingon kita sa Ginoo: “Dios ko, gisulayan ko pagbuhat ang tanan kong mahimo samtang ako nagpaabut Kanimo.” Ug mag-ampo kita nga ang Dios motubag kanato sa pag-ingon: “Maayo, buotan ug masaligan ka nga sulugoon. Sulod ngari sa kalipay sa imong Agalon.”

No comments: