MONDAY OF THE 33RD WEEK IN ORDINARY TIME (YEAR A)

LUKAS 18:35-43. Nakakita ba kita sa tinuod nga kahayag? Ang makililimos diha sa ebanghelyo usa ka tawo nga buta. Apan, aduna siyay nakita nga wala makita sa daghang mga sumusunod ni Kristo. Una, nakita niya kang Hesus ang Manluluwas nga dugay nang gipaabot sa katawhan sa Israel.  Ug ikaduha, nakita niya ang iyang dakong panginahanglan sa panabang sa Dios. Mao kini ang hinungdan sa iyang pagsinggit: “Hesus! Kaliwat ni David! Kaloy-i intawon ako!” Kining maong buta maoy nahimong modelo para kanato sa usa ka tawo nga nakakita sa tinuod nga kahayag. Gani, human ayoha, nisugod dayon siya sa paglakaw sunod kang Hesus ug nagdayeg sa Dios. Mag-ampo kita nga sama ning makiliimos mabati usab nato ang dakong panginahanglan sa Diosnong panabang ug makita si Hesus nga katumanan sa tanan natong gipangayo.