THURSDAY OF THE 32ND WEEK IN ORDINARY TIME (YEAR A)

LUKAS 17:20-25. Unsa may kahulogan sa mga pulong “Gingharian sa Dios”? Naanad kita sa paghunahuna nga ang Gingharian sa Dios usa ka lugar nga atong makita o maadtoan. Apan ang ebanghelyo karon naghatag kanato og laing pagsabot kalabot niini. Si Hesus miingon: “Ang Gingharian sa Dios dili butang nga inyong makita. Walay makaingon, 'Ania ra!' o, 'Atua ra!'; kay ang Gingharian sa Dios anaa uban kaninyo.” Dinhi atong masabut nga ang Gingharian sa Dios usa diay ka persona, si Kristo mismo, nga atong gipasulod diha sa atong kasingkasing ug sa atong katilingban. Sa atong matinud-anong pagdawat ug pagsunod kang Kristo, atong gitugotan nga Siya ang maghari sa atong kinabuhi. Kon kini ang mahitabo, mahimong kamatuoran ang Gingharian sa Langit dinhi sa Yuta.