27th Sunday in Ordinary Time (Year A)

Mateo 21:33-43

Diha sa “Sambingay sa mga Saop”, atong masabtan nga ang tag-iya sa parasan mao ang Ginoo. Usa siya ka maayo nga tag-iya tungod kay naglantaw siya sa kaayohan sa iyang gitanum pinaagi sa pagpakoral sa iyang parasan ug sa pagpatukod og tore para sa magbantay niini. Siya usab usa ka masaligon nga tag-iya tungod kay nakahimo man siya sa pagbiya sa iyang parasan sulod sa taud-taud nga panahon.

Ang ubas nga gitanum naghulagway sa katawhan nga pinili sa Dios. Aduna silay kapasidad nga mamungag daghan ug makahatag og maayong abut. Ang tag-iya sa usa ka parasan maglaum og maayong bunga sa iyang gitanum. Ang mga ubas nga dili makahatag og maayong bunga walay kwenta ug angay lamang isalibay ug sunugon. Sa samang paagi, ang Ginoo maglaum kanunay nga ang iyang katawhan mamunga unta og daghang buhat sa gugma, kalooy ug katarong. Kon dili sila makapamunga, dili na usab sila angay nga isipon nga katawhan sa Dios.

Ang mga sulugoon nga gipadala sa tag-iya sa parasan maoy nagrepresentar sa mga propeta sa Daang Kasabutan; sila maoy magsubay kon ang pinanggang katawhan sa Dios namunga og mga maayong buhat. Ang mga saop mao ang mga Hudeyo ra usab mismo, ilabina ang mga pari ug mga Pariseo; sila maoy gitahasan nga magbantay sa piniling katawhan ug maggiya kanila sa maayong dalan. Diha sa sambingay, ang mga sulugoon nga gipadala aron pagkuha sa bahin sa tag-iya gibugalbugalan, gidagmalan ug gipamatay sa mga saop. Mao usab kini ang gibuhat sa mga Hudeyo ngadto sa mga propeta nga gipadala sa Ginoo.

Ang gipadala nga anak sa tag-iya mao si Jesus. Ang Dios Amahan nagpadala kaniya sa kalibutan aron tapokon ang katawhan nga para kaniya. Kining sambingay gihatag ni Jesus agi og pagpanagna sa iyang umaabut nga kamatayon. Sama sa nahitabo sa mga propeta, siya nga bugtong Anak sa Tag-iya sa parasan, isalikway gihapon sa mga saop ug gani ila pud nga ipapatay.

Sa pagkadungog sa mga pangulong pari ug mga Pariseo niining sambingay, nasabtan nila nga sila ang gipasabut ni Jesus nga daotang mga saop. Ug nangasuko sila pag-ayo kaniya.

Unsa may angay natong makat-onan sa Ebanghelyo karong adlawa?

Una, angay natong hatagan og dakong bili ang pagpangga sa Ginoo kanato. Iya kitang gipili isip iyang katawhan; gihimong usa ka Simbahan; gihatagan og buhing pagtoo; ug gilig-on pinaagi sa mga sakramento ug sa nagkadaiyang apostolado. Gihimo sa Ginoo ang tanan aron lamang kita mabuhi, malig-on, mapanalipdan ug makapamunga og maayo. Ang atong paghatag og bili mapakita diha sa atong pagkooperar sa grasya sa Ginoo. Hinumduman nato nga kita gihatagan sa Ginoo og kagawasan nga mopili o modumili kaniya.

Ikaduha, atong hinumduman nga kita adunay bokasyon nga mahimong buotang saop o trabahante sa Ginoo. Gipiyal sa Ginoo sa matag usa kanato ang kaayohan sa iyang katawhan. Gitahasan kita nga magbuhat kutob sa atong mahimo aron nga ang katawhan sa Dios mabuhi nga malipayon. Kining maong bokasyon gihatag sa espesyal nga paagi ngadto sa mga pangulo sa gobyerno ug sa Simbahan. Sa ilang mga kamot gisangon sa Dios ang dakong tahas nga mag-alagad sa tinuoray sa mga tawo, ilabina sa mga kabos ug dinaugdaug. Sa katapusan sa panahon, matag usa kanato maghatag og kwenta atubangan sa Ginoo kalabut sa atong gipanghimo sa mga ubos natong igsoon.

Ug sa katapusan, angay natong hatagan og bili ang presensya ug tingog sa mga propeta niining modernong panahon. Kinsa man kini sila? Sila kadtong mga tawo (pari, relihiyoso, ug mga laygo) nga walay kahadlok nga moatubang sa tanang katalagman aron lamang mapadayag pinaagi sa pulong ug sa buhat ang mensahe sa gugma nga nagagikan kang Cristo. Pananglitan, usa ka propeta ang atong makita diha sa usa ka pari nga makig-uban sa mga igsoon natong Muslim diha sa dalan aron maghimo og “rally for peace”. Usa usab ka propeta ang atong masinati diha sa usa ka mambabalaod nga makigbatok sa matag “anti-life” nga probiso nga ipasaka sa atong kongreso.

Pamalandongan nato kini:

1. Ato ba nga nasinati ang pagpangga sa Ginoo kanato diha sa mga gasa ug talento nga iyang gihatag kanato?

2. Ato ba nga giila ug girespetohan ang mga tawo nga gipadala sa Ginoo kanato ingog propeta nga maoy magpahimangno kanato sa kabubut-on sa Dios?

26th Sunday in Ordinary Time (Year A)

Mateo 21:38-42

Sa sambingay sa Ebanghelyo, ang Ginoo gipakasama sa usa ka amahan nga nagsugo sa iyang duha ka mga anak sa pagtrabaho ngadto sa iyang parasan. Ang unang anak mibalibad, apan sa pagkataudtaud miusab sa iyang hunahuna ug miadto sa parasan aron magtrabaho. Ang ikaduha miyango sa sugo sa amahan, apan wala tuod moadto sa parasan. Ug nangutana si Jesus, “Kinsa man niining duha ang nagbuhat sa gusto sa amahan?”

Ang mga naminaw ni Jesus mitubag, “Ang unang anak”. Ug sakto sila tungod kay dili man igo ang mga pulong o panaad para sa Ginoo. Ang pulong kinahanglan pagaubanan sa buhat, kay kon dili wala kini kapuslanan. Si Kristo mismo nag-ingon, “Dili tanan nga moingon ‘Ginoo! Ginoo!’ ang makasaulod sa Gingharian sa Langit.”

Gipasabut sa Ebanghelyo nga ang unang anak maoy nagrepresentar sa mga mga makasasala – sama sa mga kobrador sa buhis ug mga babaye nga daotan og reputasyon. Sa ilang mga sayop nga binuhatan tabla ra nga sila mibalibad sa sugo sa Langitnong Amahan. Apan sa ilang pagkadungog sa mensahe ni Juan, mibiya sila sa ilang karaang kinabuhi ug misugod paglakaw padulong sa Dios. Ang ikaduhang anak maoy nagdala sa pagkatawo sa mga pangulong pari ug mga Pariseo. Sila ang misanong sa Kasabutan tali ni Yahweh ug sa katawhan sa Israel, apan wala sila mosunod sa tawag ni Juan alang sa paghinulsol ug pagbiya sa sala.

Ang mga kobrador sa buhis ug ang mga daotang babaye nakakita sa ilang pagkamakasasala ug nagpakita sila og interes nga magbag-o sa kaugalingon. Apan, ang mga pangulong pari ug mga Pariseo wala makakita sa ilang pagkamakasasala. Para kanila, sila matarong atubangan sa Dios, ug wala sila manginahanglan og pagbag-o sa kaugalingon. Nagtoo sila nga sila ang modelo sa kaayo ug katarong. Sila ang angay sundon; ug dili ang mosunod. Sa Ingles, kining maong batasan atong gitawag og “self-righteousness”, ang pagkabuta sa kaugalingong kahuyang ug kasal-anan. Nalimot ang mga Pariseo ug mga pangulong pari nga bisan ang pinakamatarong nga tawo masayop man, labing menos, pito ka higayon matag adlaw.

Kining Ebanghelyo naghagit kanato sa pagsanong sa hagit sa pagbiya sa sala ug sa pagsugod paglakaw uban ni Kristo. Dili na importante kon unsa kita kangil-ad karon. Hinumduman nato nga mas dako ang kalooy sa Dios kaysa atong pagkamasalaypon. Bisan gani ang mga kobrador sa buhis ug ang mga daotang babaye nag-una sa Gingharian sa Dios tungod sa ilang desisyon sa pagsunod sa dalan ni Kristo. Busa, magmapaubsanon kita nga modawat sa atong pagkamasalaypon ug magsugod kita sa pagpuyo og matarong nga kinabuhi. Pangayoon ta ang panabang sa Dios aron sa kanunay makabaton kita og igong kusog sa pagpakigbatok sa tentasyon ug sa paghimo sa angay nga buhaton.

Pamalandongan nato kini:

1. Nakakita ba kita ug nakadawat sa atong pagkamasalaypon?

2. Human madungog ang hagit sa ebanghelyo, nakahukom ba kita nga mobiya sa daotang binuhatan aron sa pagsunod ni Kristo?

25th Sunday in Ordinary Time (Year A)

Mateo 20:1-16

Sa sambingay, kinsa man ang gipasabut ni Cristo nga tag-iya sa parasan? – ang Ginoo. Kinsa man ang mga nahiunang trabahante? – ang mga Hudeyo, ilabi na ang mga Pariseo ug Saduseo tungod kay sila man ang unang nakaila sa Ginoo ug nagtrabaho sa mga templo ug sinagoga. Kinsa man ang mga naulahi sa pagtrabaho? – ang mga Hentil ug ang mga giisip nga makasasala (kubrador sa buhis, mangingisda, masakiton, daotang babaye, ug uban pa) nga gidapit ni Cristo.

Ang ganti sa mga nagtrabaho sa parasan usa ka dinario. Ang ganti sa tanan nga mosunod sa kabubut-on sa Dios mao ang Gingharian sa Langit. Para kang Cristo, dili importante ang panahon kanus-a nagsugod ang imong pagtoo sa Ginoo, o ang kadugayon sa imong pag-alagad sa Dios. Ang labing mahinungdanon mao nga sa dihang gidapit ka sa Dios, misunod ikaw Kaniya.

Usa ra ka klase ang ganti sa tanan nga moalagad sa Dios – malipayon nga pagpakig-uban Kaniya. Ug dinhi walay 1^st class, walay 2^nd class. Ang tanan managsama og kalipay ug kahimtang uban sa Ginoo. Mao kini ang maayong balita nga gidala ni Cristo. Apan, ang mga Hudeyo, ilabi na ang mga Pariseo ug Saduseo, dili makadawat ning maong kamatuoran. Maguol sila maghunahuna nga bisan ang mga hentil ug ang mga gitoohan nilang makasasala makadawat og susamang ganti nga ilang madawat. Tawhanon kaayo sila. Masinahon. Gusto nila nga sila lang ang mabulahan.

Pero si Cristo nagtudlo kanato nga lahi ang pamaagi sa Ginoo. Mao usab kini ang mensahe ni propeta Isaias diha sa unang pagbasa: Ang Ginoo miingon: “Ang akong panghunahuna dili susama sa inyo. Ang akong pamaagi dili susama sa inyo”. Lahi ang hustisya sa Ginoo tungod kay kini adunay kauban nga dakong kalooy. Ang tawo magkwenta sa oras ug sa kahago; ang Dios maghunahuna sa gugma sa pagpanerbisyo. Ang tawo mohatag kanimo og ganti human ka magtrabaho og magsakripisyo; ang Dios mohatag kanimo og grasya aron madasig ka nga motrabaho ug moserbisyo. Ang tawo mopasaylo kanimo human ka mag-antos o magbayad sa sala mong nahimo; ang Dios mismo maoy mobayad sa sala mong nahimo aron madasig ka sa pagbag-o.

Pagkalahi sa pamaagi sa Ginoo! Kung hustisya lang ang ipatuboy sa Ginoo, makaluluoy kita pag-ayo. Sa kagamay sa atong mahimo, unsa ra man unya ang grasya nga madawat nato sa Dios? Sa kadagko sa mga sala nga atong nahimo, unsaon man nato pagkadawat og pasaylo? Salamat na lang kay lahi ang hustisya ug pamaagi sa Ginoo.

Tulo ka butang ang angay natong buhaton agi og tubag sa hagit sa Ebanghelyo: Una, likayan nato nga mahisama sa mga Pariseo nga mangwenta pag-ayo ug gahi magpasaylo. Kitang tanan adunay kakulangon atubangan sa Ginoo ug tungod niini, dili kita angay magpasigarbo. Ikaduha, sama nga malipay kita sa kaluwasan nga gihatag sa Ginoo, malipay usab kita sa kaluwasan sa ubang mga tawo. Dili kita angay nga maguol kon magrasyahan ang ubang tawo tungod kay kini man ang gusto sa Ginoo. Ug sa katapusan, magmapaubsanon kita sa kanunay diha sa atong pagtrabaho ug pagpanerbisyo tungod kay ang tanang kaayo iya man sa Ginoo. Kon wala ang Dios, wala kitay mahimo.

Pamalandongan nato kini:

1. Unsa may atong ikasulti o reaksyon sa hustisya ug mga pamaagi sa Dios?

2. Ikalipay ba nato ang kaluwasan sa mga tawo nga atong gitoohan nga makasasala?

24th Sunday in Ordinary Time (Year A)

Mateo 18:21-35

Ang mga pagbasa karong Domingoha magtabang kanato sa pagsabot ngano nga angay kitang magpinasayloay sa usag-usa?

Una sa tanan, magpinasayloay kita tungod kay ang Ginoo mapasayloon man. Ang salmista nag-awit pinaagi sa pag-ingon: “Ang Ginoo maayo ug maluloy-on, dugay nga masuko ug bahandianon sa pagbati.” Kon ang Dios mapasayloon, kita, nga gihimo sa Iyang hulagway ug kasamahan, angay usab nga mahimong mapasayloon.

Ikaduha, magpinasayloay kita tungod kay kitang tanan makasasala man. Tinuod, lain-lain ang kadak-on sa atong utang o sala batok sa Ginoo, pero walay usa kanato nga wala makasala. Ang tawo nga moingon nga siya walay sala usa ka bakakon, o dili man gani buta sa kamatuoran. Dili gyud kita angay nga magpakaaron-ingnon tungod kay ang Dios nasayod ug nakakita sa atong kasingkasing. Mas maayo pa nga dawaton nato ug ikumpisal ang atong mga sala. Ang atong pagkamasalaypon makahimo unta natong masinabtanon sa kahuyang sa ubang mga tawo.

Ikatulo, angay kitang magpinasayloay tungod kay pinaagi niini kita usab pasayloon sa Dios. Diha sa unang pagbasa gipaklaro ni propeta Sirac nga ang Dios dili makapasaylo kanato kon kita magdumot ug magligotgot sa laing tawo. Kon makamao kitang mosabot sa kahuyang sa uban, makalaom kita nga sabton usab sa Ginoo. Apan kon dili kita makahatag og pasaylo sa laing tawo, dili usab kita pasayloon sa Dios. Tungod niini, si Cristo nagtudlo kanato sa pag-ampo: “Pasayloa kami sa among mga sala ingon nga kami nagpasaylo sa mga nakasala kanamo.”

Ug sa katapusan, angay kitang magpinasayloay tungod kay kini makaayo sa atong kinabuhi. Ang pagdumot makadaot sa atong kasingkasing, makahasol sa atong hunahuna, ug makaguba sa atong nindot nga adlaw. Gani, ang kaligotgot makadaot dili lang sa atong lawas kondili sa atong lawas usab. Napamatud-an sa medisina nga ang kasuko ug pagdumot adunay daotang epekto sa kahimsog sa tawo. Dugang pa niini, ang tawo nga dili makapasaylo mahimong binilanggo sa iyang kagahapon ug dili makapadayon sa iyang kinabuhi nga malinawon. Apan siya nga maghatag og pasaylo mahimong gawasnon ug magmalipayon.

Diha sa ebanghelyo, si Pedro nangutana kang Jesus: “Makapila ba makasala kanako ang akong isgkatawo ug ako gihapon siyang pasayloon? Makapito ba?” Ug gitubag siya ni Jesus pinaagi sa pag-ingon, “Dili kay makapito ra, kondili kapitoan ka pito.” Sa laing pagkasulti, walay katapusan ang atong pagpasaylo sa mga tawo nga makasala kanato. Nasayod ang Dios nga lisud para kanato ang pagpasaylo ilabi na kon kita nasakitan pag-ayo. Apan, ipabuhat gayud niya kini tungod kay nasayud Siya nga kini maoy makaayo kanato. Uban sa grasya sa Ginoo mahimo nato ang butang nga malisud tungod kay walay imposible sa Dios!

Pamalandongan nato kini:

1. Kinsa man ang mga tawo nga wala pa nato mapasaylo karon?

2. Unsa may angay natong buhaton aron mapasaylo nato ang mga nakasala kanato?

Ika-19 nga Domingo sa Ordinaryong Panahon (A)

Mateo 14:22-33

Ang Sea of Galilee mao ang lugar diin si Cristo ug ang iyang mga tinun-an magbiyahi-an aron sa pagpanagat. Kon muadto ka karon sa Sea of Galilee, makita nimo ang mga sakayan para sa mga turista nga gusto mosinati nga molabang sa Sea of Galilee. Usa ka higayon niana, dihay usa ka Pilipino nga Turista nga gusto mosakay. “Tagpila man ang boat-ride?” nangutana siya sa taga-sakayan. “$100 kada tawo”, tubag sa tigdumala. Nagbagutbot ang Pilipino sa pagkadungog niini, dayong ingon: “Bantog rang naglakaw na lang si Cristo sa tubig kay pwerte man diay’ng mahala inyong plete dinhi!”

Ang Ebanghelyo karon mahitungod sa paglakaw ni Cristo sa tubig daw usa ka paghulagway sa atong kinabuhi diha sa Simbahan uban sa Ginoo. Para sa karaang mga Hudeyo, ang dagat maoy lugar o puluy-anan sa mga daotang espiritu ug yawan-ong pwersa. Samtang, ang sakayan maoy nahimong simbolo sa Simbahan ni Cristo.

Sama sa nasinati sa mga disipulo didto sa sakayan, kita usab diha sa Simbahan makasinati usahay sa mga paghadla, katalagman o mga unos sa kinabuhi. Ang estorya magpahinumdum kanato nga haloyo sa mga katalagman, si Cristo anaa nag-uban kanato sa kanunay. Anaa lamang siya sa duol aron sa pagbantay kanato.

Kining Ebanghelyo naghagit kanato sa pagsalig sa makaluwas nga gahum sa Dios. Ang paglakaw ni Jesus sa tubig ug ang iyang pagpakalma sa unos nagpakita nga siya mas gamhanan pa kaysa tanang pwersa sa kangitngit.

Sa pag-imbita ni Jesus kang Pedro nga molakaw sa tubig padulong kaniya, tabla ra nga iya siyang gihagit sa pag-atubang sa mga katalagman uban sa pagsalig ug panabang sa Dios. Apan sa iyang katawhanon, si Pedro nalisang sa dihang nabati niya ang makusog nga hangin ug sa dihang nakita niya ang dagkong mga balod. Di ba ingon usab kita niini? Malisang kita kon hadlaon na kita sa mga problema – sakit, kapobrehon, badlongon nga anak, mabudhion nga kapikas, ug uban pa. Matarantar kita ug dili na masayud unsay atong buhaton.

Sa dihang gipunting ni Pedro ang iyang panan-aw ngadto ni Jesus, nahimo niya ang usa ka talagsaong buhat nga mao ang paglakaw sa tubig. Apan sa dihang gibalhin niya ang iyang panan-aw ngadto sa mga balod, nagsugod siya sa pagtiglom. Mao usab kini ang mahitabo kanato kon puro na lang kahadlok ug kabalaka ang maghari sa atong kinabuhi. Dili na kita masayud sa angayng buhaton ug sa hinayhinay kawad-an kitag paglaum.

Ang Ebanghelyo karon naghagit kanato nga mosalig kita sa Dios taliwala sa mga suliran sa kinabuhi. Ang pangutana mao kini: Unsaon man nato nga makabaton kita og dakong pagsalig sa Ginoo?

Si Cristo nagpakita kanato og maayong ehemplo sa makanunayong pag-ampo. Matag karon ug unya, mangita siya og kahigayonan nga mag-inusara aron makighinabi sa iyang Amahan sa Langit. Kini mao ang hinungdan sa iyang dakong pagsalig sa gugma ug panalipud sa iyang Amahan. Sa susamang paagi, kitang tanan giagni nga magmakanunayon sa pag-ampo aron makabaton kita og espiritohanong kusog nga maoy maglig-on kanato sa panahon sa kalisud. Ang kasinatian sa kadaghanan nagmatuod nga ang tawong mainampoon dugay nga mahadlok ug molahutay sa pagpakigbatok sa mga unos sa kinabuhi. Sa laing bahin, ang tawo nga walay pag-ampo dali ra maluya ug mawad-an dayon sa paglaum bisan sa gagmay lang nga mga suliran.

Pamalandongan nato kini:

1. Unsa man ang mga unos o problema nga giatubang nato karon?
2. Unsa man kadako ang atong pagsalig sa panabang sa Dios? Ato bang gipalig-on ang atong pagsalig Kaniya diha sa makanunayong pag-ampo?

Ika-16 nga Domingo sa Ordinaryong Panahon (A)

Wis 12:13, 16-19; Rom 8:26-27; Mt 13:24-30

Ang ebanghelyo ni San Mateo migamit og daghang hulagway aron ipasabut kanato ang Gingharian sa Langit. Usa niini mao ang Sambingay sa Trigo ug sa Sagbot nga atong nadungog ning Domingoha. Diha sa ebanghelyo, si Cristo mipasabut sa kahulugan sa sambingay pinaagi sa pag-ingon: “Ang tawo nga nagsabwag sa maayo nga binhi walay lain kondili ako nga Anak sa Tawo. Ang yuta nga gisabwagan mao ang kalibotan. Ang maayo nga binhi mao ang mga tawo nga nagapasakop sa paghari sa Dios. Ug ang mga sagbot mao ang mga tawo nga sakop ni Satanas. Si Satanas mao ang kaaway nga nagsabwag sa mga sagbot. Ang ting-ani mao ang kataposan sa kalibotan, ug ang mga mag-aani mao ang mga anghel. Sama nga ang mga sagbot ibton ug unya sunogon mao usab unya ang mahitabo sa kataposan sa kalibotan. Ako nga Anak sa Tawo magpadala sa akong mga anghel aron tigomon ug pagawason gikan sa akong gingharian ang tanan nga nagabuhat ug daotan nga nahimong hinungdan sa pagpakasala sa uban. Ug itambog sila ngadto sa kalayo sa impiyerno. Ug didto maghilak sila ug magkagot ang ilang mga ngipon. Ang mga matarong mosidlak sama sa adlaw didto sa gingharian sa ilang Amahan. Kinahanglan sabton gayod ninyo kining inyong nadungog!”

Unsa man ang kalambigitan sa maong sambingay sa atong kinabuhi karon?

Una sa tanan, naandan natong gihunahuna ang Gingharian sa Langit nga usa ka lugar (geographical location) diin adto mopadulong ang mga matarong. Pinaagi sa Sambingay sa Trigo ug sa Sagbot atong masabtan nga ang Gingharian sa Langit dili lamang usa ka lugar kondili usa ka kahimtang sa kinabuhi kanus-a ug diin ang kabubut-on sa Dios maoy maghari. Ang Gingharian sa Langit diay angay natong sabton isip presensya o paghari sa Dios.

Ikaduha, diha sa sambingay atong masabtan nga ang Gingharian sa Langit maanaa bisan aduna pay sala ug kadaotan sa mga tawo. Kini tungod kay si Cristo walay hunong nga nanawagan sa pagbasol ug nagpasaylo sa mga sala. Ang Gingharian o ang Paghari sa Dios nagsugod na karon dinhi sa kalibotan tungod kay matag karon ug unya adunay mga tawo nga mobiya sa daotang kinabuhi ug mosugod pagsunod sa saktong dalan nga gisubay ni Cristo.

Ikatulo, atong mabati diha sa sambingay ang dakong pasensya sa Ginoo alang sa mga sagbot sa katilingban. Ang tawhanong reaksyon atubangan sa mga daotan mao ang dinaliang pagpaibot sa mga sagbot. Kon dunay masayop o makasala, ato dayong kondenahon, papahawaon o kaha patyon. Apan dili ingon niini molihok ang Dios. Andam Siya nga mohulat o mohatag og kahigayonan sa sagbot o sa makasasala nga mausab ug mahimong trigo. Ang sambingay naghagit kanato nga magbaton sa pasensya sa Dios. Pasensyahan nato ang atong kaugalingon tungod kay aduna man kitay mga kahuyangon. Walay bisan usa kanato nga perpekto tungod kay kada tawo adunay sagbot sa sulod. Pasensyahan usab nato ang atong isigkatawo, ilabi na kadtong wala pa makakita og kahayag, o sila nga giisip natong mga hugaw sa katilingban. Pinaagi sa diosnong pasensya, daghang makasasala ang makakita og kahayag ug makabaton og kaluwasan.

Sa katapusan, ang Sambingay usa ka dakong hagit para kanato nga maningkamot nga magpabiling trigo diha sa katilingban sa Dios. Gihimo kita sa Ginoo nga maayong binhi, gitanum sa kalibotan, ug gilaoman nga makapamunga og daghang kaayohan. Mag-ampo kita nga sa pag-abut sa dakong Adlaw sa Paghukom, makaplagan kita sa mga anghel sa Ginoo nga angayon pasudlon sa Iyang gingharian.

Pamalandongan nato kini:

1. Nakita ba nato ang pagdaghan sa mga trigo o sa kaayo diha sa atong katilingban? Unsa may atong gihimo aron mapalambo ang paghari sa Dios dinhi sa kalibotan?

2. Nakita ba nato ang pagdaghan sa mga sagbot o sa kadaotan? Unsa may atong gihimo aron mapugngan ang paglaganap sa gahum sa kangitngit?