MONDAY OF THE 14TH WEEK IN ORDINARY TIME (YEAR A)

MATEO 9:18-26. Unsa may angay natong buhaton kon kita adunay pangayoon sa Ginoo? Ang opisyal diha sa ebanghelyo naghatag kanato og maayong ehemplo. Bisan habog ang iyang nahimutangan sa katilingban, ang opisyal niluhod sa atubangan ni Jesus ug nangaliyupo kaniya. Sa iyang pagluhod, gipakita sa opisyal ang iyang pagkamapaubsanon ug ang iyang pag-ila sa dakong gahum sa Dios. Bisan unsa kadato, kabantogan, ug kagamhanan ang usa ka tawo, adunay daghang mga butang nga dili niya mahimo. Apil niini ang pagtambal sa tanang sakit ug ang pagpugong sa kamatayon. Sa pagkatinuod, ang Dios lamang maoy makahimo sa tanang butang, ug siya maoy angay natong sangpiton og una sa dili pa ang uban. Sayop ang naandan nga mosangpit lang sa Ginoo sa katapusan o kon wala nay mahimo.

14th SUNDAY IN ORDINARY TIME (YEAR A)

MATEO 11:25-30. Unsa man ang mensahe sa ebanghelyo karong Domingoha? Una, gihatagan kita ni Jesus og hulagway sa Dios isip Amahan, nga maoy magbubuhat ug sinugdanan sa tanan nga anaa sa langit ug yuta. Siya ang angay natong simbahon ug pasalamatan sa tanang higayon. Ikaduha, gipahimangnoan kita ni Jesus nga ang garbo maoy babag sa atong paghigugma ug pag-ila sa Dios. Kon garboso kita ug gahi’g ulo, dili nato masabtan ang kaalam ug kabubut-on sa Dios. Ug ikatulo, gidasig kita ni Jesus nga magpabiling simple ug mapaubsanon. Ang tawo nga simple daling malipay sa mga butang nga binuhat sa Dios – sama sa nindot nga kinaiyahan, maayong panglawas, ug gugma sa kahigalaan. Samtang ang tawo nga mapaubsanon makamaong modawat sa iyang dakong panginahanglan sa Dios. Nasayod siya nga kon wala ang Ginoo, wala siyay mahimo.

SATURDAY OF THE 13TH WEEK IN ORDINARY TIME (YEAR A)

MATEO 9:14-17. Unsa may gipasabot ni Jesus sa pag-ingon, “Ang bag-ong bino angay’ng isulod sa mga sudlanan nga bag-o aron dili maunsa ang bino ug ang sudlanan”? Ang pamaagi ug pagtulon-an ni Jesus sama sa usa ka bag-ong bino nga maghatag og kalipay sa tawo. Aron mapabilin ug mapahimuslan ang iyang kalami, kinahanglan nato kining ibutang sa bag-o ug maayong kasingkasing, nga maoy silbing sudlanan niini. Ang Kristohanong pamuyo kinahanglang magsumikad sa maayong kasingkasing, kay kondili magpabilin kining pakitang-tao lamang sama sa pamaagi sa mga Pariseo diha sa ilang pagpuasa. Sa dili pa nato simbahon ang Dios atubangan sa mga tawo, ato una siyang simbahon sulod sa atong kasingkasing. Sa dili pa nato tabangan ang usa ka tawo nga may panginahanglan, ato una siyang tahuron diha sa atong kinahiladman.

FRIDAY OF THE 13TH WEEK IN ORDINARY TIME (YEAR A)

MATEO 9:9-13. Bukas ba ang atong kasingkasing sa tawag sa Dios? Si Mateo usa ka kobrador sa buhis. Giisip siya nga dakong makasasala tungod sa iyang pagpakigkumbuya sa mga banyagang Romano ug sa daot nga sistema sa pagpaningil og buhis. Apan si Mateo nagpakita og abli nga kasingkasing. Sa dihang gitawag siya ni Jesus, dali siya nga nibiya sa iyang lingkoranan aron sa pagsunod sa Ginoo. Ang iyang pagdapit kang Jesus sa kumbira didto sa iyang panimalay nagpakita sa iyang pagdawat sa Dios sulod sa iyang kinabuhi. Kining ebanghelyo magdasig kanato sa pagsusi kon unsang matang sa kinabuhi kining atong gipuy-an karon – moral ba o dili, diosnon ba o yawan-on? Hinaot unta nga sama kang Mateo, kita andam nga mobiya sa atong daotang kinabuhi aron sa pagsunod kang Kristo.

THOMAS THE APOSTLE (YEAR A)

JUAN 20:24-29. Unsa may panig-ingnan ni Tomas nga angay natong sundon? Naandan na ang pagtawag kang Tomas og “Doubting Thomas” ug ang iyang pagduhaduha giisip nga buling sa iyang pagkatawo. Apan, dili man sayop ang pagsusi sa mga taho nga dili pa klaro o wala pa mapamatud-i. Si San Gregorio nag-ingon nga “Ang wala dayon pagtoo ni Tomas naghatag kanato og mas dakong pagtulon-an kaysa sa pagtoo sa ubang mga apostoles.” Si Tomas nagahatag kanato og ehemplo sa pagkamatinud-anon sa iyang pagbati. Tungod niini, naiya ang talagsaong kahigayonan nga makahikap sa mga samad sa Nabanhaw’ng Ginoo. Ug human niya napamatud-an ang pagkabanhaw, wala na siya nagpanuko sa pagpadayag sa iyang pagtoo. Gani, gisangyaw niya kini sa walay kahadlok hangtod nga siya gipatay didto sa India sa tuig 72 A.D. tungod kang Kristo.

WEDNESDAY OF THE 13TH WEEK IN ORDINARY TIME (YEAR A)

MATEO 8:28-34. Kinsa man ang makapahawa sa mga daotan? Gikahinagbo ni Jesus diha sa dalan ang duha ka tawo nga nasudlan og panon sa mga daotang espiritu. Panon kini ug dili lang pipila ka mga demonyo. Dako kini nga pwersa sa yawa. Apan gisaysayan kita sa ebanghelyo nga ang mga demonyo niila kang Kristo isip anak sa Dios ug nasayod sa iyang gahum sa pagbuntog kanila. Ug tuod man, sa usa lamang ka pulong sa pagmando, gipapahawa ni Jesus ang mga daotang espiritu ug kini nanulod sa mga baboy, nangambak sa lanaw ug nangalumos. Dinhi atong masabot nga ang pwersa sa yawa walay ikasukol sa gahum sa Dios. Busa, kon ugaling atong mabati ang presensya sa mga daotang espiritu diha kanato ug sa atong katilingban, atong sangpiton ang ngalan ni Jesus ug hangyoon siya sa pagbugaw sa mga demonyo palayo kanato.