FRIDAY OF THE 1ST WEEK OF ADVENT (YEAR B)

MATEO 9:27-31. Unsa may atong gusto nga madawat karong umaabot nga Pasko? Diha sa ebanghelyo adunay duha ka buta nga nagpakilooy kang Hesus – gusto sila nga makakita. Unsa kaha kon kini usab ang atong pangayoon sa Ginoo – ang grasya nga makakita sa kamatuoran. Usa ka awit ang nagkanayon: “Buta kita sa pagpakabana, buta kita sa luha. Ug way pulos ang kahayag sa atong mga mata kon sa kasingkasing magpabilin tang buta.” Sa pagkatinuod, kada tawo adunay pagkabuta. Adunay mga tawo nga dili makakita sa ilang kaanindot; ang uban dili makakita sa ilang kadaotan. Adunay mga tawo nga buta sa kaayo sa isigkatawo; ang uban buta sa panginahanglan sa mga silingan. Ning kapaskohan, hangyoon nato ang Ginoo nga iya kitang tabangan nga makakita sa mga butang nga angay natong makit-an.

THURSDAY OF THE 1ST WEEK OF ADVENT (YEAR B)

MATEO 7:21, 24-27. Kinsa man ang makasulod sa Gingharian sa Dios? Usa ka babaye ang mapasigarbohon nga miingon kang San Pedro: “Nyor, angay ko nimong pasudlon sa langit.” Nangutana si Pedro kaniya, “Ngano man?” Ug mitubag ang babaye, “Nag-ampo ko ug nagbasa sa Bibliya. Wala koy gibuhat nga daotan. Limpyo ang akong mga kamot.” Apan miingon si San Pedro kaniya: “Inday, tinuod limpyo ang imong mga kamot, apan wala man kini nahimo nga maayo para sa uban. Nindot unta’g nahugaw ang imong kamot tungod sa pagtabang sa mga kabos. Pasensya na, apan dili ko ikaw pwedeng pasudlon dinhi. Ang Ginoong Hesus mismo ang nag-ingon: ‘Dili ang tanan nga magtawag kanako, 'Ginoo, Ginoo', makasulod sa Gingharian sa Langit, kondili kadto lamang nagtuman sa kabubut-on sa akong Amahan.’”

WEDNESDAY OF THE 1ST SUNDAY OF ADVENT (B)

MATEO 15:29-37. Unsa may atong buhaton isip mga Kristiyano atubangan sa kalisod sa ubang mga tawo? Ang pagpiyong sa mga mata o pagtalikod sa problema sa uban dili gyod angayan. Diha sa ebanghelyo si Kristo nagpakita kanato og maayong panig-ingnan. Nibati siya’g dakong kalooy sa mga tawo nga nagsunodsunod kaniya. Apan dili lamang siya kutob sa kalooy. Gani, nilihok siya aron paghupay sa gibati sa mga masakiton ug sa mga gigutom. Ang ehemplo ni Kristo magtuklod unta kanato sa paglihok para sa kaayohan sa mga may panginahanglan. Ang atong kalooy ubanan nato sa buhat. Dili nato matabangan ang tanan tungod kay igo-igo lamang ang atong katakos ug ang atong bahandi. Apan, bisan pa niini, ang gamay nga atong mahimo, kon bendisyonan sa Ginoo, makatabang na sa daghang mga tawo.

TUESDAY OF THE 1ST WEEK OF ADVENT (YEAR B)

LUKAS 10:21-24. Unsa man ang pinakahabog nga matang sa kahibalo ug unsaon man nato pagkab-ot niini? Ang pinakabililhong matang sa kahibalo mao ang kahibalo mahitungod sa Ginoo. Bisan unsa pa kadaghan sa mga butang nga nahibalo-an sa usa ka tawo, wala kini bili kon ang maong tawo wala makaila sa Ginoo. Atong masabtan kang Kristo nga ang kahibalo ug pagka-ila sa Dios makab-ot lamang sa mga tawo nga adunay simple ug mapaubsanong kasingkasing. Ang tawo nga garboso ug mapahitas-on posible nga makahibalo unsa ang Dios, apan dili gyud siya makaila kinsa ang Dios. Aron makaila kita sa Ginoo kinahanglan maghatag kita og igong panahon para sa pag-ampo ug pagpamalandong sa Iyang mga Pulong. Ug kini mahimo nato kon atong himoong simple ang atong kinabuhi ug pamuyo.

MONDAY OF THE 1ST WEEK OF ADVENT (B)

MATEO 8:5-11. Unsa man nga batasan ang angay natong huptan kon kita anaa sa taas nga hut-ong sa katilingban? Ang opisyal nga Romanhon diha sa ebanghelyo maoy atong modelo. Una, ang maong opisyal nagpakita’g dakong pagtoo sa makaluwas nga gahum ni Kristo. Bisan tuod ubos sa iyang pagmando ang gatosan ka mga sundalo, miila siya nga adunay mas gamhanan pa kay kaniya, ang Ginoo. Ug ikaduha, nagpakita kining opisyal og usa ka maloloy-ong kasingkasing. Sa mga Romano niadtong higayona, ang ulipon gipakasama og bili sa usa ka mananap nga igo lamang patrabahoon ug pwedeng pasakitan o ibaligya sama sa usa ka butang. Apan, kining opisyal naghangyo ug nagpakilooy kang Hesus alang sa kaayohan sa iyang ulipon. Bisan siya adunahan ug gamhanan, ang opisyal nagpabiling makatawhanon ug manggihunahuna-on.