SATURDAY OF THE 2ND SUNDAY OF ADVENT (YEAR B)

MATEO 17:10-13. Unsa man ang dakong panawagan ning panahon sa Adbyento? Ang mga Judio sa panahon sa Balaang Kasulatan nagtoo nga kon muabot na ang Mesiyas, ipadala sa Ginoo si propeta Elias aron pagsangyaw mahitungod niini. Si Juan mao ang katumanan sa papel ni Elias ug nag-andam sa dalan sa Manluluwas pinaagi sa pag-awhag sa mga tawo nga magbag-o ug maghinulsol sa mga sala. Isip mga magtotoo, angay kitang mosanong sa panawagan ni Juan. Andamon nato ang atong kasingkasing pinaagi sa paghinulsol sa atong mga sala ug pagkumpisal niini ngadto sa pari. Dugang pa niini, andamon nato ang atong kaugalingon pinaagi sa pagpakighiuli sa atong isigkatawo, ilabi na sa atong mga kaaway. Kon mahimo nato kini, sigurado gyod nga mahimong makahuloganon ang atong pagsaulog sa Pasko.

FRIDAY OF THE 2ND WEEK OF ADVENT (YEAR B)

MATEO 11:16-19. Unsa may hinungdan ngano nga mobalibad ang mga tawo sa pagdapit sa Ginoo? Sama sa katawhan sa panahon ni Kristo, daghan karon ang wala maghatag og bili sa mga butang nga espirituhanon ug matarong. Abtik kaayo sila mosanong kon dapiton nimo sa mga kalingawan. Apan kon dalhon nimo sa Simbahan aron mag-ampo ug mamalandong, luya kaayo ug wala diha ang atensyon. Daghan kaayo sila og higayon para sa trabaho ug sa negosyo. Apan kon imong paapilon sa mga apostolado sa Simbahan aron makaangkon og bahanding langitnon, mobalibad dayon kay apeke sa panahon. Mao kini rason ngano nga daghang mga tawo ang wala makasinati og makahuloganong kinabuhi. Ang tinuod nga kalipay dili makaplagan sa materyal nga mga butang; anaa kini sa pagsunod ni Kristo ug sa pagbuhat og maayo.

THURSDAY OF THE 2ND WEEK OF ADVENT (YEAR B)

MATEO 11:11-15. Unsa may angay natong buhaton taliwala sa mga daotan ning kalibotan? Matag karon ug unya masinati nato ang mga mangil-ad nga tawo ug panghitabo sa katilingban. Usahay makasilingan kita og mga tawong laog ug tsismosa. Usahay mahimo kitang biktima sa pagpanikas ug inhustisya. Adunay kamatuoran ang giingon sa ebanghelyo: “Sukad pa sa mga adlaw ni Juan Magbubunyag hangtod karon, ang gingharian sa langit nahiagom sa kapintas, ug ang mga mapintas nangusog sa pag-ilog niini.” Isip mga sumusunod ni Kristo gidasig kita nga magpuyo nga malinawon ug madasigon taliwala sa inadlaw-adlaw nga mga hagit, kalisod ug tintasyon sa kinabuhi. Pinaagi sa pagpasaylo sa mga kaaway, sa pagdawat sa mga pagsulay, ug sa matinud-anong pagpangalagad, atong madani ang daghang mga tawo sa pagsunod kang Kristo.

WEDNESDAY OF THE 2ND WEEK OF ADVENT (YEAR B)

MATEO 11:28-30. Unsa may gipasabot ni Kristo sa iyang pag-ingon: “Sayon ang yugo nga akong ihatag kaninyo, ug gaan ang ipapas-an ko kaninyo”? Ang yugo maoy simbolo sa pagpangalagad tungod kay kini usa man ka instrumento nga ita-ud sa mananap aron makaserbisyo sa iyang agalon. Ang yugo ni Kristo sayon ug gaan tungod kay ipapas-an man kini uban sa gugma. Kon mahigugma kita sa atong trabaho, dili nato bati-on ang kakapoy. Kon mahigugma kita sa mga tawo nga atong gi-alagaran, dili usab kita abuton og kaluya. Nganong lami man ang pagkaon nga niluto sa inahan? Kini tungod kay ang pagkaon giluto man uban sa gugma. Nganong gaan man pas-anon ang atong igsoon? Kini tungod kay ang gipas-an ato man nga hinigugma. Busa, aron mahimong gaan ang tanan nga atong buhaton, ubanan nato kini kanunay og gugma ni Kristo.

TUESDAY OF THE 2ND WEEK OF ADVENT (YEAR B)

MATEO 18:12-14. Unsa man nga matang sa Dios ang atong nailhan? Duha ka gagmay'ng bata, babaye ug lalaki, ang nagbarog atubangan sa usa ka retrato sa Kristo nga Hari nga naglingkod sa Iyang trono. Sa maong hulagway adunay nasulat, “God is watching you”. Nangutana ang babaye kon unsay kahulogan sa mga pulong. Ug mitubag ang lalaki: “Ang Ginoo nagbantay sa atong mga lihok. Nasayod siya kon gatarong kita o wala. Kon makasala kita, Iya dayon kitang silotan.” Nahilom ang batang babaye nga murag namalandong. Taudtaod, namulong kini sa pag-ingon: “Para kanako, ang ‘God is watching you' nagpasabot nga gimahal kita pag-ayo sa Dios ug kanunay Siyang nagbantay nga walay daotan nga mahitabo kanato.” Kining batang babaye nakaila sa Ginoo nga gihulagway sa ebanghelyo karon isip Maayong Magbalantay sa mga karnero.

2ND SUNDAY OF ADVENT (YEAR B)

MARCOS 1:1-8. Unsa may atong andamon alang sa pag-abot sa Ginoo? Si San Juan mao ang tingog nga nagsinggit: “Andama ninyo ang dalan alang sa Ginoo, hawani ninyo ang iyang agianan!” “Hinulsoli ug biyai ang inyong mga sala ug pabunyag kamo ug pasayloon kamo sa Dios!” Ang pagpangandam nga gipanawagan ni San Juan dili materyal kondili espiritwal. Ang dalan nga agi-an sa Ginoo mao ang dalan padulong sa atong kasingkasing nga maoy sentro sa atong kinabuhi. Sa atong pagpaabot sa Mesiyas, kinahanglan nga atong  basolan ang mga sala, hunongon ang kalaog, ug wagtangon ang mga kasuko ug pagdumot. Ning higayona, daghan kanato nagpahiluna na sa mga dayandayan para sa kapaskohan. Hinaot nga dili kita malimot sa labing mahinungdanong pagpangandam nga mao ang atong pagpakighiuli sa Ginoo ug sa isigkatawo.