MISA DE GALLO DECEMBER 19

LUKAS 1:5-25. Unsa man ang bili ug katuyo-an sa matag bata nga mahimugso ning kalibotan? Sa ebanghelyo ang tigulang nga magtiayon nga si Zacarias ug Isabel gihatagan sa Dios sa dugay na nilang gipangandoy – usa ka anak nga tawgo’g Juan, ngalan nga nagpasabot, “Ang Ginoo manggiloloy-on”. Ang matag tawo nga mahimugso usa ka gasa sa Dios, dako og bili, ug adunay papel sa kalibotan. Si Juan gipakatawo ubos sa gahum sa Dios aron mag-andam sa dalan sa Mesiyas. Sa samang paagi, ang matag usa kanato gasa sa Dios para sa atong mga ginikanan ug para sa kalibotan. Si Mark Twain nag-ingon: “Ang duha ka importanteng adlaw sa atong kinabuhi mao ang adlaw sa atong pagkahimugso ug ang adlaw kanus-a kita makaamgo nganong ani-a kita ning kalibotan.” Kini ang atong pamalandongan – Unsa may tuyo sa Dios sa paghimo kanato?

MISA DE GALLO DECEMBER 18

MATEO 1:18-25. Magpabilin ba ang atong pagtoo sa Dios bisan kon anaa kita sa kahimtang nga makalibog ug malisod? Ang ebanghelyo naghatag kanato’g duha ka modelo sa lig-ong pagtoo. Ang una mao si Maria, nga nagmabdos sa gahum sa Espiritu Santo. Ang iyang pagsabak makalibog ug pwedeng maghatag kaniya’g dakong kaulawan. Apan, si Maria nisalig sa gisulti sa anghel ug nitahan sa iyang kinabuhi ngadto sa Dios. Ang ikaduha mao si Jose, nga bisan sa dili masabtang pagmabdos ni Maria, nagpabiling matarong ngadto sa iyang hinigugma. Gipaminaw ug gisunod niya ang mensahe sa anghel nga nagpakita kaniya pinaagi sa damgo. Hinaot nga mahisama kita kang Jose ug Maria nga magpabiling matoohon ug masaligon bisan unsay mahitabo. Dili kita mahadlok ug mabalaka tungod kay ang Dios “Emanuel”; anaa Siya uban kanato.

MISA DE GALLO DECEMBER 17

MATEO 1:1-17. Giunsa man nato pagdawat ang atong kaliwatan? Ang atong mga kaliwat puwede nga maghatag kanato’g dungog; pwede usab sila nga maghatag og kaulawan. Kasagaran, ikaulaw nato ang mga kaliwat nga nakahimo’g dakong sala. Apan dili ingon niini ang pagbati ni San Mateo. Ang iyang listahan sa kaliwat ni Hesus nag-apil sa mga tawo nga nakahimo’g eskandalo sama kang Rahab nga usa ka daotang babaye ug kang David nga nakigrelasyon kang Batsheiba nga asawa sa iyang sundalo. Pinaagi niini, gipakita sa ebanghelyo ang dakong tuyo sa pagpakatawo sa Ginoo nga mao ang pagpasaylo ug pagluwas sa mga makasasala. Hinaot nga kita usab makamaong modawat ug magpasaylo sa atong mga igsoon ug kaparyentihan nga nakasala o nakahimo’g dakong sayop alang sa kalinaw ug kaayohan sa atong pamilya.

MISA DE GALLO DECEMBER 16

JUAN 5:33-36. Unsa may makalipay sa Dios gikan kanato? Sa unang pagbasa karon ang libro ni Isaias nag-awhag: Puy-i ang hustisya, higugmaa ang kaayo (Do justice, love kindness). Ang maong panawagan mabasa usab nato sa libro ni Micah, nga maoy gihimong tema sa Simbahan sa Pilipinas ning kasaulogoan sa Tuig sa mga Kabos. Kitang tanan gidasig nga magmaki-angayon ug magmaloloy-on sa isigkaingon. Ang hustisya atong ipatigbabaw sugod diha sa atong panimalay, eskuylahan, merkado, opisina ug sa katilingban. Dili kita mamintaha, dili manikas, ug dili mosuporta sa mga buhat nga mapahimuslanon. Ang kalooy atong ugmaron diha sa atong kasingkasing sa matag adlaw. Dili kita mopiyong kon adunay mga tawo nga tabangonon. Molihok kita aron pagtabang kanila tungod kay pinaagi niini kahimut-an kita sa Dios.

3RD SUNDAY OF ADVENT (B)

Juan 1:6-8, 19-28. Unsaon man nato pagpabati ang espiritu sa Kapaskohan? Samtang nagkaduol na ang adlaw sa Pasko sa Pagkatawo sa atong Ginoo, gidasig kita sa Simbahan nga mahisama ni San Juan Magbubunyag nga maghatag og pagmatuod ni Kristo diha sa atong tagsatagsa ka kinabuhi. Ipadan-ag nato ang kahayag ni Kristo aron malamdagan ug mapanindot ang katilingban. Unsaon man? Si San Pablo nag-ingon, “Pagmaya kanunay . . . Pag-ampo ug pasalamati ang Dios sa tanang higayon . . . Pilia ang maayo ug likayi ang daotan.” Usa kini ka hagit sa pagpuyo og malipayon, mapasalamaton, maampoon, ug matarong nga kinabuhi diha sa panimalay, eskuylahan, opisina, merkado, ug sa tanang mga dapit. Kon mahimo nato kini, matawo gayod si Kristo diha sa atong kaugalingon, diha sa atong pamilya, ug diha sa atong katilingban.

3RD SUNDAY OF ADVENT (YEAR B)

Is 61:1-2, 10-11; 1 Thes 5:16-24; Jn 1:6-8, 19-28

Ang santos nga Misa sa ikatulo nga Domingo sa Adbyento pagasugdan niining pasiunang mga pulong: Gaudete in Domine semper! (Paglipay sa kanunay diha sa Dios!). Ang tradisyon nagtawag niining adlawa og “Gaudete Sunday” o “Domingo sa Kalipay” aron agnihon ang katawhan nga magpabiling malipayon sa ilang pagpaabut sa Dios.

Sa Adbyento, ang pari magsul-ob og violet vestments agi og pagpakita nga kini ang panahon sa paghinulsol. Apan niining ikatulo nga Domingo sa Adbyento, ang pari magsul-ob og “rose vestments” aron sa pagpadayag nga diha sa paghinulsol ang mga tawo angay nga magpabiling mahinangpon tungod kay nagkaduol na ang kaluwasan nga gidala sa Dios. Ang unang pagbasa nagsulti kanato nga angay kitang maglipay tungod kay ang Mesiyas moabut aron sa pagluwas kanato sa daghang matang nga pagkabilanggo, lawasnon ug espirituhanon.

Ang Ebanghelyo nagpaila kanato kang San Juan nga maoy naghatag og testimonya kang Hesus, ang kahayag sa kalibutan. Ang pag-abut ni Hesus maoy panahon sa dakong kalipay tungod kay wagtangon niya ang kangitngit sa kalibutan ug lamdagan niya ang kinabuhi sa tanan nga mosunod ug motoo kaniya.

Niining nagkaduol nga mga adlaw sa Pasko, kita gidapit sa Simbahan nga mahisama ni Juan Bautista nga maghatag og pagmatuod ni Kristo, ang kahayag sa kalibutan. Diha sa atong tagsatagsa ka kinabuhi, atong ipadan-ag ang kahayag ni Kristo aron nga malamdagan ang mga tawo sa atong palibot. Unsaon man? Diha sa ikaduhang pagbasa, si San Pablo nagtudlo kanato og pipila ka pamaagi:

“Pagmaya kanunay.” Para kang San Pablo, madani nato ang mga tawo ngadto kang Kristo kon kita kanunay nga malipayon. Kining maong kalipay bunga sa malinawon nga kasingkasing, dili sa bahandi ug materyal nga mga butang. Ang tinuod nga Kristiyano magpabilin nga mahinangpon bisan pag hadla-on siya sa mga problema ug pagsulay sa kinabuhi tungod kay masaligon man siya sa panabang sa Ginoo.

“Pag-ampo ug pasalamat sa Dios sa tanang panahon.” Diha sa makanunayong pag-ampo, mapakita nato sa mga tawo ang atong pagtoo nga kon wala si Kristo wala kitay mahimo. Ang tanang kinabuhi ug mga butang iya sa Dios. Magmapasalamaton kita sa kanunay tungod kay grasya man ang tanan, apil ang atong mga abilidad ug talento. Tungod kay grasya man ang tanan, dili kita angay magpanuko sa pagpaambit sa atong kaayohan ngadto sa uban nga may panginahanglan.

“Pilia ang maayo ug likayi ang daotan.” Si San Pablo naghagit kanato nga magpuyo og matarong nga kinabuhi. Sa pamilya, sa pag-eskuyla, sa trabaho, sa negosyo, ug sa pagdula, angay kita nga magmaki-angayon sa tanan. Likayan nato ang pagpamintaha ug pag-abuso sa atong mga kauban. Kon mahimo nato kini, makita sa mga tawo ang Ginoo nga atong gisunod ug mahatagan og kredibilidad ang pagtoo nga atong gihuptan.