THURSDAY OF THE 4TH WEEK OF LENT (YEAR B)

JUAN 5:31-47. KINSA MAN ANG TAWO NGA HAMBUGERO? Siya ang tawo nga magdayeg sa iyang kaugalingon ngadto sa uban. Iyang ipanulti ang iyang mga nahimo, nahibaloan, natigom, nadaog ug uban pa. Apan dili kini mao ang angay'ng buhaton sa usa ka Kristiyano. Sa ebanghelyo, si Kristo miingon, “Kon magsaksi ako mahitungod sa akong kaugalingon, ayaw tuohi ang akong isulti. Apan may lain nga nagsaksi mahitungod kanako.” Ang tigsaksi nga Iyang gipasabot dinhi mao si Juan nga magbubunyag, ug labaw sa tanan, ang Iyang Langitnong Amahan nga nahimuot pag-ayo kaniya. Kining ebanghelyo magtudlo kanato nga ang usa ka Kristiyano dili angay mahimong hambugero. Nakasabot siya sa giingon sa Panultihon: “Maoy padayga kanimo ang ubang tawo. . . apan ayaw pag-unay pagdayeg sa imong kaugalingon” (27:2).

FEAST OF SAINT JOSEPH, HUSBAND OF MARY (YEAR B)

MATEO 1:16, 18-21, 24. KINSA MAN ANG “TUNAY NGA LALAKI”? Adunay moingon: “Lalaki ka kon kahadlokan ka”, “Lalaki ka kon kusog ka moinum”, ug “Lalaki ka kon daghan kag uyab”. Sa pagkatinuod, ang mga sikolohista nagtudlo nga ang pag-inisog pwede nga takuban lamang sa lawom nga kahuyang sa tawo. Giingnan usab kita nga ang pagpanghambog usa ka timailhan sa kakulang sa self-confidence, kakulang sa abilidad, ug kakulang sa pagtagad. Ang Simbahan naghatag kanato’g modelo sa tinuod nga lalaki – si Jose nga bana ni Maria. Usa siya ka tawo nga matarong. Wala siya mag-inisog, apan nagpakita og kalig-on taliwala sa mga peligro. Hilom, apan daghan og gihimo. Sibo ni Jose ang giingon ni Henry W. Beecher: “The strength of a man consists in finding out the way in which God is going, ang going in that way too.”

WEDNESDAY OF THE 4TH WEEK OF LENT (YEAR B)

JUAN 5:17-30. KANG KINSANG MANG KABUBUT-ON ANG ATONG GISUNOD SA ATONG KINABUHI? Adunay mga tawo nga walay pagtagad sa hunahuna sa uban; ang ilang gusto ra gayod maoy matuman. Naa puy mga tawo nga gasunodsunod ra sa kagustohan sa uban – sa ilang agalon, mga ginikanan, mga igsoon, o kaha mga kahigalaan. Sila ang mga tawo nga walay baroganan. Lahi ang panig-ingnan nga gipakita ni Kristo diha sa ebanghelyo karon. Gipasabot niya nga ang Dios Amahan ug siya nahiusa diha sa gugma. Ang tanan nga iyang gibuhat nahisubay gayod sa mga buluhaton sa iyang Amahan. Wala siyay gisulti ug gihimo nga sukwahi sa pamaagi sa Langitnong Amahan. Pagkanindot unta kon sa atong kinabuhi ang mga laraw ug buhat sa Dios mao usab ang atong gisunod ug gipuy-an.

TUESDAY OF THE 4TH WEEK OF LENT (YEAR B)

JUAN 5:1-16. MATINUD-ANON BA ANG ATONG PAGBALIK SA GINOO? Adunay mga tawo nga  mobalik sa Ginoo kon aduna nay bati-on sa lawas. Mabuotan kon masakit na. Aduna puy uban nga mabuotan kon hadlaon sa mga dagkong suliran. Maingon nato nga ang sakit ug problema nahimong grasya nga nagtakoban tungod kay pinaagi niini nabalik ang tawo ngadto sa Ginoo. Apan, adunay pipila nga human mamaayo ug human masulbad ang problema, mobalik sa daotang binuhatan. Dili kini angayan. Diha sa ebanghelyo, human ayoha ni Hesus ang tawo nga nagmasakiton sulod sa 38 ka tuig, iya kining gipahimangnoan: “Tan-awa, naayo ka na. Ayaw na pagpakasala aron dili ka mahi-agom sa labi pang mangil-ad nga hitabo.” Ning Kwaresma si Hesus nagdasig usab kanato nga human kita mamaayo ug mapasaylo, magpabilin na gayod kita diha kaniya.

MONDAY OF THE 4TH WEEK OF LENT (YEAR B)

JUAN 4:43-54. UNSA MAY MAKUHA SA TAWO NGA ADUNAY DAKONG PAGTOO SA DIOS? Ang ebanghelyo nagsaysay mahitungod sa usa ka tawo nga miduol kang Hesus ug mihangyo alang sa kaayohan sa iyang anak nga masakiton. Si Hesus miingon kaniya: "Pauli sa inyo. Ang imong anak naayo na." Ang tawo mipauli sa ila uban ang dakong pagsalig sa mga pulong ni Hesus. Wala niya baliha ang posibilidad nga dili mahitabo ang giingon ni Hesus ug nga kataw-an siya sa mga tawo tungod sa iyang simpleng pagtoo. Wala makawang ang iyang pagsalig tungod kay ang iyang anak naayo sumala sa giingon sa Ginoo. Kining ebanghelyo magdasig kanato sa pagdala sa atong mga problema ngadto sa Dios uban ang dakong pagsalig nga kita iyang paminawon ug tabangan. Ang atong dakong pagtoo sa gugma ug kalooy sa Dios Amahan maoy magdala kanato'g kalinaw ug kaayohan.

4TH SUNDAY OF LENT (B)

JUAN 3:14-21. UNSA MAY MAGDALA SA TAWO NGADTO SA KALUWASAN? Naanad kitang maghunahuna nga aron makasulod sa langit kinahanglan maghimo kita’g mga maayong buhat. Kini ang gitudlo kanato sukad pa sa atong pagkabata. Bisan tuod adunay kamatuoran kining maong pagtulon-an, aduna usab kini kakulangon. Kini makaingon sa pagsabot nga ang kaluwasan usa ka butang nga atong makab-ot tungod sa atong kaugalingong paningkamot. Ug ang uban pwedeng mahimong mapasigarbohon tungod sa pagbuhat og maayo. Sa iyang sulat ngadto sa taga-Efeso, si San Pablo nagpahinumdum kanato nga ang kaluwasan usa ka grasya sa Dios. Ang Dios maoy nilihok pag-una, Siya ang nagpadala sa Iyang Bugtong Anak aron pagluwas kanato. Busa, angay kitang magmapasalamaton, dili magmapasigarbohon, sa kaluwasan nga atong naangkon.