MONDAY OF THE 10TH WEEK IN ORDINARY TIME (YEAR B)

MATEO 5:1-12. NGANONG BULAHAN MAN ANG TAWO NGA KABUS SA ESPIRITU, NAGSUBO, MAPAUBSANON, NAGTUMAN SA SUGO SA DIOS, MALULUY-ON, PUTLI OG KASINGKASING, NAGLIHOK ALANG SA KALINAW, GILUTOS, GIBUGALBUGALAN UG GIBUTANGBUTANGAN? Ang maong tawo bulahan tungod kay siya nahiusa man kang Kristo. Ang “Beatitudes” o “Pagkabulahan” naghulagway sa pagkatawo ug kasinati-an ni Kristo. Sa iyang tibuok kinabuhi, gituman niya ang kabubut-on sa iyang Langitnong Amahan. Nagtrabaho siya alang sa katarong, kalinaw, hustisya ug kaangayan. Tungod niini, siya gipasipad-an, gibugalbugalan, gilutos ug gipatay. Ingon usab niini ang masinati sa mga magmatinud-anon sa pagsunod kang Kristo. Ug sama sa ilang Magtutudlo, bulahan sila tungod kay maangkon nila ang Gingharian sa Dios.

SATURDAY OF THE 9TH WEEK IN ORDINARY TIME (YEAR B)

MARCOS 12:38-44. UNSA MAY MAGHATAG OG KAHULOGAN SA ATONG PAG-AMPO UG PAGSIMBA SA DIOS? Ang atong relasyon sa Ginoo kinahanglan nga ubanan sa atong maayong relasyon sa isigkatawo. Gisaway ni Kristo ang mga Magtutudlo sa Balaod tungod kay haloyo sa ilang tag-as nga mga pag-ampo, nanlupig sila sa mga biyuda ug nangilog sa ilang mga katigayonan. Ang ilang pagsimba sa Dios nahimong pakitang-tao na lamang ug dili bililhon sa mga mata sa Ginoo. Hinaot nga dili unta kini mahitabo kanato. Magrespeto kita sa isigkatawo, magmaki-angayon, ug magtabang sa mga nanginahanglan aron nga ang atong mga pag-ampo ug atong kinabuhi mismo mahimong makahuloganon. Adunay nag-ingon: “A beautiful life does not just happen. It is built daily by prayer, humility, sacrifice and hardwork.”

THURSDAY OF THE 9TH WEEK IN ORDINARY TIME (YEAR B)

MARCOS 12:28-34. UNSA MAN ANG LABING NINDOT NGA HALAD PARA SA GINOO? Ang ebanghelyo nagtudlo nga ang halad nga makalipay sa Dios dili ang kwarta o butang nga atong dalhon sa altar, kondili ang paghigugma Kaniya sa tibuok natong kasingkasing, hunahuna ug kusog, ug ang paghigugma sa isigkaingon sama sa paghigugma sa kaugalingon. Sa ato pa diay, ang atong kwarta o butang nga dalhon sa simbahan walay bili kon sa inadlaw-adlaw natong kinabuhi wala kitay panahon para sa Ginoo ug wala usab kitay pagbati para sa isigkatawo. Mahisama ra kita sa usa ka ginikanan nga magsigi la’g hatag og kwarta ug butang sa anak apan walay igong panahon ug mainitong pagbati para kaniya. Nindot ang gisulat ni John Weiss: “The truest worship is a life; All dreaming we resign; We lay our offerings at thy feet, Our lives, O God, are Thine.”

WEDNESDAY OF THE 9TH WEEK IN ORDINARY TIME (YEAR B)

MARCOS 12:18-27. ADUNA BAY PAGKABANHAW SA MGA PATAY? Bisan tuod ang mga Saduseo sakop sa relihiyosong pundok, sila walay pagtoo sa pagkabanhaw. Tungod kini kay ang pagkabanhaw wala hisgoti sa balaod ni Moises. Gawas niana, kasagaran sa mga Saduseo mga adunahan ug gamhanan sa katilingban ug wala silay dakong hinungdan nga mangandoy og laing kalibotan nga maghatag og kalipay. Apan dili kita angay’ng maghupot sa susamang hunahuna ug pagbati. Si Hesus nagtudlo nga ang atong Dios usa ka Dios sa mga buhi, ug dili sa mga patay. Siya usab nag-ingon: “Ako ang pagkabanhaw ug ang kinabuhi; ang motuo kanako bisan patay na siya, mabuhi” (Juan 11:25). Nindot ang gisulti ni Martin Luther: “Our Lord has written the promise of resurrection, not in books alone, but in every leaf in springtime.”

TUESDAY OF THE 9TH WEEK IN ORDINARY TIME (YEAR B)

Marcos 12:13-17. KINSA MAY NANAG-IYA SA ATONG KINABUHI? Sa karaang panahon ang sensilyo gipanag-iya sa sa emperador, kang kinsang hulagway nakatatak niini. Sa pag-ingon ni Hesus, “Ihatag kang Cesar ang mga butang nga iya ni Cesar ug sa Dios ang butang nga Iya sa Dios”, iyang gipasabot nga ang sensilyo nga adunay panagway sa emperador angay nga ihatag ngadto sa emperador. Apan ang tawo, nga gitatakan sa panagway sa Dios, angay nga ihalad ngadto sa Dios. Ang Dios, dili ang emperador o bisan kinsang pangulo, maoy tag-iya sa atong kinabuhi. Busa, ang atong numero unong obligasyon ngadto gayod sa Dios nga maoy atong Magbubuhat ug Amahan. Uban ni San Pablo kita moingon: “If we live, we live to the Lord, and if we die, we die to the Lord. So then, whether we live or we die, we belong to the Lord” (Roma 14:8).

MONDAY OF THE 9TH WEEK IN ORDINARY TIME (YEAR B)

MARCOS 12:1-12. KINSA MAN ANG TAG-IYA SA TANAN NING KALIBOTAN? Ang Sambingay sa mga Saop magpahinumdum kanato nga ang Dios maoy tag-iya sa tanang mga butang. Kitang mga tawo mga piniyalan lamang ug gilaoman sa Dios nga mag-amping ug magpalambo sa Iyang kabtangan ug kabuhatan. Nindot kini nga pahimangno tungod kay daghan kanato nagkinabuhi nga murag maoy tag-iya – laog ug hakog, mapahimuslanon ug abusado sa mga hinimo sa Ginoo. Ang Salmo 24:1 nag-ingon, “The earth is the Lord’s and everything in it; the world and those who live in it.” Sanglit iya sa Dios ang tanan, kinahanglan makamao kita mag-amping ug mogamit sa hustong paagi sa mga butang ning kalibotan. Hatagan nato ang Dios og bahin sa atong mga abot ug magpaambit kita ngadto sa isigkatawo kay kini mao may iyang gusto.