Monday of the 3rd Week in Ordinary Time (Year C)

Marcos 3:23-30. Sa unsa mang paagiha ang tawo dili maluwas? Ang mga magtutudlo sa Balaod mipasangil nga si Jesus migamit sa gahum ni Beelsebul sa Iyang paghingilin sa mga yawa. Usa kini ka pagpanamastamas sa Espiritu Santo, ang gahum sa Dios nga anaa kang Cristo. Maingon nato nga mas maayo pa gani ang yawa kay niila sa gahum ni Jesus, samtang ang mga magtutudlo sa Balaod wala. Tungod niini dili gayod nila madawat ang kaluwasan nga gidala ni Cristo. Si San Juan miingon: “Ang tawo nga motoo kang Jesus makaangkon og kinabuhing dayon; apan ang tawo nga walay pagtoo dili makadawat og kinabuhi ug pagahukman sa Dios.” Sa atong kabahin, mitoo ba kita nga si Cristo adunay gahum sa pagluwas kanato batok sa tanang daotan ug katalagman? 

3rd Sunday in Ordinary Time (Year C)

Neh 8:2-4, 5-6, 8-10; Cor 12:12-30; Lc 1:1-4; 4:14-21

Sa tungatunga sa wali sa pari, dihay lalaki nga nakatulog. Mihunong ang pari sa pagwali ug giingnan niya ang asawa sa lalaki nga galingkod diha ra sa tapad: “Day, pukawa sab nang imong bana oy. Nganong imo man lang siyang gipasagdang makatulog?”

Apan mitubag ang babaye pinaagi sa pag-ingon: “Padre, ikaw ray pukaw niya kay ikaw baya ang nakaingon nga nakatulog na siya!”

Ang pagbasa, pagpaminaw ug pagpasabut sa Pulong sa Dios nahimong dakong kabahin  sa kinabuhi sa katawhan sa Israel. Pananglitan, gisaysayan kita diha sa unang pagbasa  kon giunsa pagdala sa usa ka pari nga gingalag Esdras ang Libro sa Balaod ni Moises ngadto sa katawhan nga nagkapundok, apil ang mga kabataan. Diha sa iyang pagpaambit ug pagpasabot sa Pulong sa Dios, gidasig ni Esdras ang katawhan nga magpabiling madasigon ug masaligon haloyo sa mga kalisod ug pagsulay nga ilang nasinati. Pinaagi sa makanunayong pagpaminaw sa Pulong sa Ginoo, ang katawhan sa Israel nailhan isip katawhan sa Dios ug nahatagag makahuloganong kinabuhi.

Ang pag-adto ni Jesus sa sinagoga matag Adlawng Igpapahulay nagpakita sa iyang pagkamatinud-anon sa tradisyon sa iyang katawhan. Ang ebanghelyo nagsaysay nga usa niana ka higayon si Jesus mibarog sa sinagoga, mikuha sa basahon, ug mibasa sa usa ka bahin sa sulat ni Isaias nga nag-ingon: “Ang Espiritu sa Ginoo ania kanako. Gidihogan ko niya aron pagdala sa maayong balita ngadto sa mga kabos, pagsangyaw og kagawasan sa mga binilanggo, paghatag og bag-ong kahayag sa mga buta ug kagawasan sa mga dinaogdaog, ug sa pagpahibalo sa tuig sa kalooy sa Ginoo.” Adunay batid sa Bibliya nga misugyot nga kining bahina sa Kasulatan maoy paborito ni Jesus tungod kay kini naghatag og katin-awan sa iyang pagkatawo ug misyon isip anak sa Dios.

Si propeta Isaias nagsangyaw mahitungod sa usa ka kahimtang nga maoy gusto sa Dios para sa iyang katawhan – usa ka kalibutan nga pagaharian sa kaangayan, kagawasan, gugma ug kalinaw. Sa pag-ingon ni Jesus, “Karong adlawa ang maong panagna natuman samtang namati mo kanako”, iyang gipasabot nga ang kabubut-on sa Dios natuman diha kaniya. Siya ang pinili nga gipasabot ni Isaias nga maoy magdala’g maayong balita ngadto sa mga kabos, kagawasan sa mga binilanggo, kahayag sa mga buta, ug kaluwasan sa mga dinaogdaog.

Karong Domingoha kita gidasig, una sa tanan, sa paghatag og dakong bili sa Pulong sa Dios. Ang Pulong sa Ginoo mao ang pagkaon sa atong kalag. Ang Salmo karong adlawa nagpahinumdom kanato nga ang Pulong sa Dios maoy maghatag og bag-ong kinabuhi, kaalam sa mga yano, kalipay sa kasingkasing sa mga tawo ug lamdag sa atong mga mata (Salmo 18:7-9). Busa, angay gayod nga sa matag adlaw atong busgon ang atong kaugalingon sa mga Pulong sa Ginoo. Mahimo nato kini pinaagi sa makanunayong pagbasa ug pagpamalandong sa Balaang Kasulatan.

Unsa man ang kalainan sa Bibliya sa mga Katoliko ug sa Bibliya sa mga Protestante? Ang tubag mao kini: Ang Bibliya sa mga Katoliko manimahong ok-ok kay kanunay man naa sa aparador ug dili magamit. Samtang ang Bibliya sa mga Protestante manimahong ilok kay kanunay man nila nga bitbiton aron mabasa matag karon ug unya.

Bisan tuod makapakatawa ang maong komedya, aduna kiniy kamatuoran. Kitang mga Katoliko adunay pagkulang sa pagbasa sa Balaang Kasulatan. Ang Simbahang Pilipinhon nagdeklara ning semanaha nga “National Bible Week” aron dasigon ang katawhan sa pagbasa, pagtoon ug pagpamalandong sa mga Pulong sa Ginoo.

Ug ikaduha, ang Simbahan naghagit kanato sa pagtrabaho uban sa Ginoo alang sa katumanan sa Iyang plano para sa mga kabos, dinaogdaog ug nagkalisod. Pinaagi sa atong bunyag, kita nakaambit dili lamang sa dignidad ni Jesus kondili sa Iya usab nga misyon. Sama kang Cristo, kita adunay tawag sa paghatag sa kaugalingon alang sa pagpagaan sa kalisod sa mga kabos, pagpalingkawas sa mga naulipon sa sala, ug sa paghatag og maayong panig-ingnan alang sa mga kulang og kahibalo.

Diha sa ikaduhang pagbasa, gihulagway ni San Pablo ang katawhan sa Dios isip “Lawas ni Cristo”. Kini maoy iyang pamaagi sa pagdasig kanato sa pag-alagad sa usag-usa. Sanglit kabahin man kita sa usa ka lawas, angay gayod nga maghunahuna kita sa kaayohan sa tanan. Dili maayo nga ang atong kaugalingon lamang ang atimanon o amomahon. Gani, si Pablo mipasabot nga angay natong hatagan og pabor ang mga nagkalisod sama nga ang Dios mihatag og mas dakong pagtagad sa mga anaa sa ubos sa katilingban (1 Cor. 12:22-25). Ug midugang pa gayod si Pablo sa pag-ingon: “Kon usa ka sakop ang mag-antos, dapat mag-antos ang tanan uban kaniya; kon adunay usa ka miyembro nga mapasidunggan, angay nga magsadya ang tanan uban kaniya” (1 Cor. 12:25-26).

Saturday of the 2nd Week in Ordinary Time (Year C)

Marcos 3:20-21. Unsa may atong makuha sa pagsunod sa kabubut-on sa Dios? Sa dihang nibiya si Jesus sa iyang pamilya aron sa pagbuhat sa misyon nga gisangon kaniya sa Langitnong Amahan, nasinati niya ang pagbiay-biay gikan sa iyang mga kaparyentihan. Ang ebanghelyo karon nagsaysay nga buot nilang sikopon si Jesus tungod kay nagtoo sila nga siya nawad-an og saktong panghunahuna. Labing siguro sakit kaayo para kang Jesus nga ang iya mismong mga kadugo wala makasabot sa iyang gibuhat. Kon kita magmatinud-anon sa atong pagka-anak sa Dios, aduna usay mga tawo nga dili makasabot kanato. Adunay malipay, apan dili kalikayan nga aduna usay masilo. Bisan pa man niini, magpabilin kitang masaligon nga ang Dios nga maoy atong gituman kanato usab maoy maglaban.

Wednesday of the 2nd Week in Ordinary Time (Year C)

Marcos 3:1-6. Daotan ba ang pagbati og kasuko? Ang ebanghelyo naghisgot sa pipila ka higayon nga si Jesus nasuko: una, sa dihang iyang gipangbugaw ang mga namaligya didto sa templo; ikaduha, sa dihang gipugngan sa mga tinun-an ang mga bata nga buot moduol kaniya; ug ikatulo, diha sa ebanghelyo karon, diin naglagot siya sa kagahi’g ulo sa mga Pariseo nga naghunahuna og ngil-ad sa iyang pagbuhat og kaayohan panahon sa Adlaw’ng Igpapahulay. Atong makita nga ang kasuko ni Jesus dili para sa iyang kaugalingon kondili para sa kaayohan sa uban – sa mga kabos, mga bata, ug mga masakiton. Kining ebanghelyo magtudlo kanato nga ang kasuko usa ka normal nga pagbati, ug dili kini sayop kon adunay bug-at kaayong hinungdan, ilabina kon para sa kaayohan sa uban.

Tuesday of the 2nd Week in Ordinary Time (Year C)

Marcos 2: 23-28. Unsa may gisugo sa Adlaw’ng Igpapahulay? Usa sa Napulo ka Sugo sa Ginoo mao ang pagbalaan sa Adlaw’ng Igpapahulay, nga para sa mga Katoliko mao ang adlaw’ng Domingo. Ning maong adlaw, obligado kita nga mohunong sa pagtrabaho sa atong naandang buluhaton aron sa pagsimba ug pagdayeg sa Dios. Apan wala kini magpasabot nga dili na kita molihok ning maong adlaw. Gani, mahimo man kita nga magbuhat sa atong mga apostolado matag Domingo. Kon kinahanglanon kaayo, mahimo usab kita nga motrabaho aron sa pagluwas og kinabuhi, atoa o sa laing tawo. Sa pag-ingon ni Jesus, “Ang Adlawng Igpapahulay gibuhat alang sa kaayohan sa tawo”, buot lamang niyang ipasabot nga ang kaluwasan sa tawo mas importante kaysa bisan unsang balaod.