Wednesday of the 20th Week in Ordinary Time (Year C)

Mateo 20:1-16. Unsa may mensahe sa sambingay sa mga “Trabahante sa Parasan”? Pinaagi ning sambingay kita gipahimangnoan ni Jesus nga sa pagpangalagad dili kita angay’ng magkwenta sa kadugayon sa atong pagtrabaho ug sa kadako sa atong nahimo. Ang tanan grasya sa Dios. Bisan gani ang atong kadasig sa pag-alagad tinuklod man sa grasya. Busa, dili kita angay’ng manghambog ug manukot og ganti sa atong kahago. Ang Dios makamaong magpatigayon sa tanan nga nahigugma kaniya. Dili kita angay’ng masina sa grasya sa ubang mga tawo tungod kay sila ato mang mga igsoon diha ni Cristo. Ang ilang kadaogan ato nga kadaogan, ug ang ilang kalipay ato usab nga kalipay. Igo na para kanato ang kamatuoran nga kitang tanan gipahiluna sa Kahitas-an.

Tuesday of the 20th Week in Ordinary Time (Year C)

Mateo 19:23-30. Unsa may angay'ng buhaton sa mga dato aron makasulod sa Gingharian sa Langit? Una, ang mga dato angay'ng magbantay nga dili mahimong ulipon sa bahandi. Dili nila angay'ng hutdon ang ilang panahon ug kusog sa pagpangita’g kwarta. Angay silang maghatag og panahon sa pagpalambo sa ilang espiritohanong kinabuhi, ilabina sa ilang relasyon uban sa Dios ug sa isigkaingon. Ug Ikaduha, ang mga dato angay maglikay nga mamahimong laug. Kinahanglan nga makat-on sila sa pagpaambit sa ilang bahandi ngadto sa uban, ilabina sa mga kabos ug may panginahanglan. Hinumduman nila kanunay nga ang tanang bahandi iya sa Dios. Ug gusto sa Tag-iya nga maghigugmaay ug magtinabangay kitang tanan nga Iyang mga piniyalan.

Monday of the 20th Week in Ordinary Time (Year C)

Mateo 19:16-22. Unsa may angay natong buhaton aron maangkon ang kinabuhing dayon? Kining maong pangutana bililhon kaayo ug angay lamang nga ang tubag niini masayran sa kada tawo. Diha sa ebanghelyo gipasabot ni Jesus sa batan-ong lalaki nga ang pagsunod sa mga kasugoan sa Dios kinahanglan atong buhaton aron ang kaluwasan maangkon. Pinaagi niini, atong mapakita nga kita nagtahod sa Makagagahum. Apan dili lang kini mao. Ang atong pagsunod sa mga kasugoan kinahanglang pagaubanan usab og kasingkasing nga andam mobiya sa tanan aron sa pag-alagad sa Dios ug sa mga kabos. Sa pagbuhat sa ingon, atong mapadayag nga kita dili kalibotanon, ug nga ang Gingharian sa Dios mao gyod ang atong gihandum.

Saturday of the 19th Week in Ordinary Time (Year C)

Mateo 19:13-15. Unsa may sakto – ang magbinata o ang magpakabata? Ang magbinata ingon ani: Mangayo ka sa Dios bisan unsay imong gusto. Kon ihatag ang imong gipangayo, malipay ka ug daygon nimo ang Ginoo; kon dili, mangluod ka ug mohunong sa pag-ampo. Maayo ka ug matinabangon sa mga tawo nga magdayeg nimo. Pero, masuko ka ug makigbungol sa mga tawo nga lain og hunahuna nimo. Ingon ani ba ang gusto sa Dios para nato? Dili. Ang magpakabata ingon ani: Mitubo ka na ug miasenso, apan nagpabilin kang mapaubsanon ug masaligon sa Ginoo. Adunay mga tawo nga imong gikasumpaki, apan dili ka magdumot ug dali rang magpasaylo. Kini mao ang kalidad sa mga bata nga maoy gustong ipasunod kanato ni Cristo.

Solemnity of the Assumption of Mary (Year C)

Lucas 1:39-56. Nganong gipauna man sa pagpasaka sa langit ang Mahal nga Birhen Maria sa tanang mga magtotoo? Anaa ba sa Biblia ang maong pagtulon-an? Ang nahitabong pagpasaka sa langit ni Maria wala mahisulat sa Biblia, apan kabahin kini sa Tradisyon sa Simbahan sukad pa sa Iyang sinugdanan. Si Maria adunay talagsaong papel sa plano sa Labaw’ng Makagagahom. Ang Dios naghimo og mga dagkong butang para kaniya. Si Maria “bulahan sa mga babaye nga tanan” tungod kay gipili siya sa Dios nga mahimong inahan sa Iyang Bugtong nga Anak. Tungod kay si Maria inahan sa Dios, angay lamang nga dili na siya pahulaton sa kinabuhing dayon nga gisaad sa tanan nga mahigugma ug mosunod kang Jesus. Ug kita puno sa paglaom nga buhaton usab sa Dios kanato ang gibuhat na niya kang Maria.

Tuesday of the 19th Week in Ordinary Time (Year C)

Mateo 18:1-5,10,12-14. Kinsa man ang gipasabot ni Jesus nga sama sa “mga bata”, nga maoy labing halangdon sa mata sa Dios? Una, ang “mga bata” mao ang mga tawo nga labing nanginahanglan og tabang. Sila ang mga kabos, walay trabaho, masakiton, inosente, ug walay tingog sa katilingban. Kon ato silang tagdon ug tabangan, tabla ra nga atong gidawat si Cristo. Ikaduha, ang “mga bata” mao ang mga tawo nga mapaubsanon ug wala mangandoy nga daygon sa katawhan. Nasayod sila nga ang tanan nga ilang nakab-ot bunga sa kalooy sa Dios. Ug sa katapusan, ang “mga bata” mao ang mga tawo nga kanunay nagasalig sa Ginoo. Kada adlaw mag-ampo sila tungod kay nasayod sila nga kon wala ang Dios wala silay mahimo.