FRIDAY OF THE 25TH WEEK IN ORDINARY TIME (YEAR A)

LUKAS 9:18-22. Unsa may kalainan ning duha ka pangutana – “Sumala sa mga tawo, kinsa man ako?” ug “Para kaninyo, kinsa man ako?” Ang unang pangutana buot magtuki sa mga kasayuran nga makat-onan sa usa ka tinun-an mahitungod kang Kristo gikan sa laing mga tawo. Sa Pilosopiya gitawag kini og “conceptual knowledge”, nga pwedeng maangkon pinaagi sa pagpaminaw, pagbasa, ug pagtuon. Ang ikaduhang pangutana buot mahibalo sa personal nga kasinati-an sa usa ka tinun-an uban kang Kristo. Gitawag nila kini og “experiential knowledge”, nga makab-ot lamang pinaagi sa makanunayong pagpakig-uban sa Ginoo diha sa pag-ampo, pagpamalandong, ug pagbuhat sa Iyang apostolado. Kini nga matang sa kahibalo ang mas bililhon tungod kay dinhi maila nga ang tinun-an tinuod nga higala ug sumusunod ni Kristo.

THURSDAY OF THE 25TH WEEK IN ORDINARY TIME (YEAR A)

LUKAS 9:7-9. Komusta man ang kahimtang sa atong tanlag – malinawon ug malipayon ba, o gubot ug mahadlokon ba hinoon? Ang ebanghelyo nagsaysay sa usa ka hari nga gihasol sa iyang tanlag. Si Herodes maoy nagpapatay kang Juan nga Magbubunyag, ang tawo nga ningbarog sa kamatuoran ug nagsaway sa iyang relasyon kang Herodias nga asawa sa iyang igsoon. Ang tanang matang sa sala, dili lang ang pagpatay, makahasol sa konsensya ug makabalisa sa kalag sa tawo. Kon dili nato kini basolan o ikumpisal sa pari, dili matono ang atong kinabuhi. Adunay panultihon nga nag-ingon, “Wala gyoy komo sa konsensya nga limpyo.” Tinuod kini. Kon limpyo ang atong tanlag, ang atong pamati kanunay’ng gaan ug malinawon. Molakaw kita nga walay kahadlokan, mokaon kita nga ganado, ug matulog kita nga kontento kaayo.

WEDNESDAY OF THE 25TH WEEK IN ORDINARY TIME (YEAR A)

LUKAS 9:1-6. Para asa man ang kahibalo, katakos ug gahum nga gihatag sa Ginoo kanato? Diha sa ebanghelyo atong nasayran nga ang mga tinun-an gihatagan ni Hesus og gahum ug awtoridad dili para gamiton sa ilang kaayohan lamang, dili aron sa pagpasigarbo sa ilang kaugalingon, ug dili aron sa pagdagmal og laing tawo. Hinoon, gihatagan sila’g kahibalo, katakos ug gahum aron gamiton sa pag-ayo sa mga masakiton, pagpahawa sa mga daotang espiritu ug sa pagpatunhay sa Gingharian sa Dios. Aduna akoy mga higala nga mga panday nga andam motrabaho nga walay sweldo kada Sabado aron sa paghimo’g mga balay para sa mga kabos. Pagkanindot unta kon adunay mga doktor, abogado, ug uban pang mga propesyonal nga motrabaho nga dili magpabayad – bisan usa lang ka adlaw kada semana – para sa mga walay kwarta.

TUESDAY OF THE 25TH WEEK IN ORDINARY TIME (YEAR A)

LUKAS 8:19-21. Kinsa man ang mga tawo nga gitawag og “nominal Christians” o “Kristiyanos sa ngalan lamang”? Kasagaran, isipon nato nga “nominal Christians” ang mga tawo nga nabunyagan apan dili mosimba, o kaha mihunong na sa pagsulod sa Simbahan. Apan wala kaayo nato masabti nga bisan ang mga tawo nga kanunay’ng magsimba o mag-ampo pwede gihapong tawgon nga “Kristiyanos sa ngalan lamang” kon sila wala magpuyo sa mga maayong hiyas nga gitudlo ni Kristo. Diha sa ebanghelyo si Hesus miingon: “Ang akong inahan ug mga igsuon mao kadtong mamati sa Pulong sa Dios ug magtuman niini.” Sa ato pa, diha lamang sa pagbuhat sa kabubut-on sa Dios kita mahimong sakop sa pamilya ni Hesus ug mahimong tawgon nga tinuod nga mga Kristiyanos.

MONDAY OF THE 25TH WEEK IN ORDINARY TIME (YEAR A)

LUKAS 8:16-18. Unsa may atong buhaton sa gasa sa pagtoo nga atong nadawat gikan sa Ginoo? Una, angay natong sabton pag-ayo ang pagtoong Kristiyano pinaagi sa seryosong pagtoon ug mainampoong pagpamalandong niini. Kon ugaling adunay pagtulon-ang Kristiyano nga wala nato masabti o atong gikalibgan, moduol kita sa mga pari ug relihiyoso aron mangutana. Ikaduha, angay natong sundon ug puy-an ang mga pagtulon-ang Kristiyano nga atong gitoohan. Matod pa sa ebanghelyo, ang pagtoo sama sa usa ka suga nga angay natong ipadayag aron magsilbi sa iyang katuyoan nga mao ang paghatag og kahayag sa katilingban. Kon ang pagtoo dili nato puy-an, mamatay kini ug mawala kanato. Pero, kon ang pagtoo atong ipakita sa buhat, molambo kini ug mamunga’g daghang kaayohan.

25TH SUNDAY IN ORDINARY TIME (A)

MATEO 20:1-16. Unsa man ang mensahe sa Sambingay sa mga Trabahante? Una sa tanan, ang sambingay nagtudlo nga ang Dios sa tanang panahon nagdapit sa mga tawo pagtrabaho alang sa Iyang paghari sa kalibotan. Matag usa kanato gitawag sa Dios nga mahimong kabahin sa Iyang dakong plano sa kaluwasan. Usahay maghunahuna kita nga ulahi na ang tanan kay naguba na ang atong kinabuhi, nahinaykan na nato sa pagbinugoy ug pagbinuang. Apan sayop kini nga panghunahuna. Walay ulahi sa Dios. Bisan karong gutloa, ang Dios nagpaabot nga kita motrabaho para Kaniya. Dugang pa niini, ang sambingay nagtudlo nga ang ganti sa mga motrabaho para sa Dios managsama para sa tanan. Walay 1st class, walay 2nd class. Sayo o ulahi ka man nagtrabaho para sa Ginoo, madawat nimo ang ganti sa kinabuhing dayon didto sa Langit.