TUESDAY OF THE 7TH WEEK OF EASTER (YEAR B)

JUAN 17:1-11. UNSA MAN ANG KINABUHING DAYON? Ang kinabuhing dayon wala lamang magpasabot og kinabuhing walay katapusan. Ang natad sa syensa ug medisina nagsigig pangitag mga paagi sa pagpalungtad sa kinabuhi sa tawo, apan kini dili garantiya sa usa ka maayong kinabuhi para kanato. Para asa man ang kinabuhi nga taas kon kini dili malipayon o makahuloganon? Para sa Balaang Kasulatan, ang kinabuhing dayon dili lamang katas-on sa kinabuhi (quantitative) kondili kalidad sa kinabuhi (qualitative). “Kini ang kinabuhing dayon, nga sila makaila Kanimo, ang bugtong matuod nga Dios, ug ang Imong gipadala, si Hesukristo.”  Nga sa ato pa, ang kinabuhing dayon mao ang usa ka kinabuhi nga nahilambigit pag-ayo sa Buhing Dios, ug tungod niini, puno sa kalinaw, kalipay ug gugma nga walay sama.

SATURDAY OF THE 6TH WEEK OF EASTER (YEAR B)

JUAN 16:23B-28. UNSA MAY GIPASABOT SA GIINGON NI HESUS, "BISAN UNSAY INYONG PANGAYOON SA AMAHAN SA AKONG NGALAN IYANG IHATAG KANINYO"? Kini wala magpasabot nga makapangayo kita bisag unsa nga atong gusto basta lamang gamiton nato ang mga pulong “kini among gipangayo sa ngalan ni Hesus, Amen”. Ang pag-ampo “sa ngalan ni Hesus” nagpasabot hinoon nga kita mag-ampo sama sa iyang paagi ug kagustohan. Sama kang Hesus, atong himoon ang pag-ampo nga kabahin sa atong kinabuhi. Matag karon ug unya moduol kita sa Dios sama sa usa ka anak nga mamarayeg sa iyang mapinanggaong Amahan. Ug kon duna man kitay pangayoon, kadto lamang mga butang nga subay sa Iyang kagustohan. Si John Buchan nag-ingon: “Prayer opens the heart to God, and it is the means by which the soul, though empty, is filled by God.”

FRIDAY OF THE 6TH WEEK OF EASTER (YEAR B)

JUAN 16:20-23. KANUS-A MAN MAHIMONG KALIPAY ANG ATONG MGA KASAKIT? Gigamit ni Kristo ang hulagway sa usa ka inahan nga nagbati. Dili lalim ang kasakit nga masinati sa usa ka babaye nga manganak. Apan ang tanan niyang kasakit malimtan ug mapulihan sa dakong kalipay inigkakita niya sa iyang nahimugsong anak. Sa atong pagsunod kang Kristo, makasinati usab kita’g mga sakripisyo – diha sa pagpakigbatok sa daotan, sa pagbarog sa kamatuoran, sa pagpasaylo, sa paghigugma sa mga kaaway, ug uban pa. Apan ang tanan natong kasakit mapulihan og kalipay human nato makita ang bunga sa atong maayong buhat. Nindot ang giingon ni Helen Keller: “The struggle in life is one of our greatest blessings. It makes us patient, sensitive and Godlike. It teaches us that although the world is full of suffering, it is also full of the overcoming of it.”

THURSDAY OF THE 6TH WEEK OF EASTER (YEAR B)

JUAN 16:16-20 MAKAHIMO BA ANG DIOS SA PAGBIYA KANATO? Usahay makapangutana kita niini ilabina sa mga panahon nga aduna kitay dagkong suliran. Sa ebanghelyo si Hesus miingon sa iyang mga tinun-an: "Sa dili madugay mawala ako kaninyo, apan sa dili madugay inyo akong makauban. . . Ang inyong kaguol mahimo unya nga inyong kalipay." Nakapalibog kini sa mga tinun-an, apan sa Pentekostes nasabtan nila nga si Hesus dili gayod mobiya kanila. Magpabilin siya sa ilang kinabuhi pinaagi sa Espiritu Santo, nga maoy tigpanalipod, tigpalig-on ug tighatag og kalipay. Busa, sa sunod higayon nga kita adunay dagkong problema ug pag-antos, dili nato angay’ng bati-on nga kita gipasagdan sa Dios. Motoo kita sa iyang gisaad sa libro sa mga Hebreo: “I will never fail you, I will never abandon you” (13:5).

MARY, LADY OF FATIMA (YEAR B)

JUAN 19:25-27. UNSA MAY PAPEL SA BIRHEN SA FATIMA DIHA SA ATONG KINABUHI? Didto sa Plaza ni San Pedro sa Roma, samtang si Pope John Paul II nagsakay sa iyang popemobile, usa ka turko nga ginganlag Mehmet Ali Agca ang nipusil kaniya. Duha ka bala ang niigo kaniya ug hapit nilagbas sa iyang baga. Human ang iyang milagrosong pagkaayo, si Pope John Paul II nideklara nga siya giluwas sa Mahal nga Birhen sa Fatima tungod kay napusilan siya apan naluwas sa Mayo 13, 1981, nga mao ang ika-64 nga tuig anibersaryo sa pagpakita sa Birhen ngadto sa 3 ka bata didto sa Fatima, Portugal diadtong tuig 1917. Para sa Santo Papa, ang Birhen sa Fatima mao ang inahan sa Simbahan nga maoy nagmatuto, nag-agak, ug nanalipod kanato sa tanang higayon. Kini maoy katumanan sa gisugo ni Hesus didto sa krus: “Babaye, ania ang imong anak.”

TUESDAY OF THE 6TH WEEK OF EASTER (YEAR B)

JUAN 16:5-11 UNSA MAY PAPEL SA ESPIRITU SANTO DIHA SA ATONG KINABUHI ISIP MGA TINUN-AN? Gisultihan ni Hesus ang mga tinun-an nga dili magsubo sa iyang pagbiya tungod kay iyang ipadala kanila ang Balaang Espiritu, nga mao ang Maghuhupay. Sama ni Kristo, ang mga tinun-an pagalutoson tungod sa pagsaksi sa kamatuoran. Ingon niini ang atong masinati kon magtarong kita sa atong pagpuyo, pagtoon, pagtrabaho, o kaha pagnegosyo. Adunay masina, masuko, ug manaot kanato kon kita dili moapil sa binuang o sa pagpakasala. Apan dili kita angayng mabalaka tungod kay ang Espiritu sa Dios maoy atong Manlalaban ug Maghuhupay. Angay nato siyang ilhon ug sangpiton sa matag adlaw. Matod pa sa usa ka magsusulat, “The Christian who neglects the Holy Spirit is like a lamp that is not plugged in.”