SATURDAY OF THE 25TH WEEK IN ORDINARY TIME (YEAR B)

LUKAS 9:43-45. NGANONG ANGAY MANG ATUBANGON ANG KAMATUORAN? Human gipanagna ni Hesus ang iyang umaabot nga pag-antos ug kamatayon, ang mga tinun-an nabalisa pag-ayo. Apan wala sila mangutana kabahin niini tungod kay nahadlok man sila. Dili nila gustong dawaton ang kamatuoran mahitungod sa umaabot nga pagpanglutos. Dili ba ingon usab kita niini? Talikdan nato ang kamatuoran. Mahadlok kitang mahibalo sa atong sakit ug tungod niini, dili kita magpadoktor. Mahadlok kitang masayod sa atong kahuyang ug tungod niini dili kita maminaw sa isulti sa uban. Si Hesus nag-ingon: “The truth will set you free.” Pinaagi sa kamatuoran, ang tawo masayod kon unsay angay niyang buhaton o usbon sa kaugalingon. Sakto ang gisulat ni Pearl Bailey: “You never find yourself until you face the truth.”

FRIDAY OF THE 25TH WEEK IN ORDINARY TIME (YEAR B)

LUKAS 9:18-22. UNSA MAY KALAINAN NING DUHA KA PANGUTANA – “SUMALA SA MGA TAWO, KINSA MAN AKO?” UG “PARA KANINYO, KINSA MAN AKO?” Ang unang pangutana magtuki sa nasayran sa tinun-an mahitungod kang Kristo gikan sa laing mga tawo. Sa Pilosopiya gitawag kini og “conceptual knowledge”, nga maangkon pinaagi sa pagpaminaw, pagbasa, ug pagtuon. Ang ikaduha buot mahibalo sa personal nga kasinati-an sa tinun-an uban kang Kristo. Gitawag kini og “experiential knowledge”, nga makab-ot pinaagi sa makanunayong pagpakig-uban sa Ginoo diha sa pag-ampo, pagpamalandong, ug pagbuhat sa Iyang kasugoan. Kini nga matang sa kahibalo ang mas bililhon tungod kay dinhi maila nga ang tinun-an tinuod nga higala ni Kristo. Our task as Christians is not only to know about God, but to know God personally and to become His friend.

THURSDAY OF THE 25TH WEEK IN ORDINARY TIME (YEAR B)

LUKAS 9:7-9. UNSA MAY KAHIMTANG SA ATONG TANLAG – MALINAWON UG MALIPAYON BA, O GUBOT UG MAHADLOKON BA HINOON? Ang ebanghelyo nagsaysay sa usa ka hari nga gihasol sa iyang tanlag. Si Herodes maoy nagpapatay kang Juan nga Magbubunyag, ang tawo nga ningbarog sa kamatuoran ug nagsaway sa iyang relasyon kang Herodias nga asawa sa iyang igsoon. Ang tanang matang sa sala – pagpatay, pagpanapaw, pagpanikas, pagpangawat, ug uban pa – makabalisa sa konsensya. Kon dili nato kini basolan o ikumpisal sa pari, dili mahapsay ang atong kinabuhi. Adunay panultihon nga nag-ingon, “There is no pillow so soft as a clear conscience.” Kon limpyo ang atong tanlag, ang atong pamati maayo. Molakaw kita nga walay kahadlokan, mokaon kita nga ganado, ug matulog kita nga malinawon kaayo.

WEDNESDAY OF THE 25TH WEEK IN ORDINARY TIME (YEAR B)

LUKAS 9:1-6. PARA ASA MAN ANG GAHOM, KAHIBALO, UG KATAKOS NGA GIHATAG SA GINOO KANATO? Ang mga tinun-an gihatagan ni Hesus og gahom ug katakos dili aron gamiton sa ilang kaayohan lamang, dili sa pagpasigarbo sa kaugalingon, ug dili sa pagdagmal og laing tawo. Gihatag kini ni Hesus aron ilang gamiton sa pag-ayo sa mga masakiton, pagpahawa sa mga daotang espiritu ug pagpatunhay sa Gingharian sa Dios. Aduna akoy mga higalang panday nga motrabaho matag Sabado, nga dili magpasuhol, aron sa paghimo’g mga balay sa kabos. Pagkanindot unta kon adunay mga doktor, abogado, ug ubang mga propesyonal nga motrabaho nga dili usab magpabayad – bisan usa lang ka adlaw kada semana – para sa mga kabos ug maluyahon. Si Pablo Picasso nag-ingon, “The meaning of life is to find your gift. The purpose of life is to give it away.”

TUESDAY OF THE 25TH WEEK IN ORDINARY TIME (YEAR B)

LUKAS 8:19-21. KINSA MAN ANG MGA TAWO NGA GITAWAG OG “NOMINAL CHRISTIANS” O “KRISTIYANOS SA NGALAN LAMANG”? Kasagaran, isipon nato nga “nominal Christians” ang mga tawo nga nabunyagan apan dili mosimba, o kaha nihunong na sa pagsulod sa Simbahan. Wala nato masabti nga bisan ang mga tawo nga kanunay’ng magsimba o mag-ampo pwede gihapong tawgon nga “Kristiyanos sa ngalan lamang” kon sila wala magpuyo sa mga hiyas nga gitudlo ni Kristo. Si Hesus miingon: “Ang akong inahan ug mga igsuon mao kadtong mamati sa Pulong sa Dios ug magtuman niini.” Sa ato pa, diha lamang sa pagbuhat sa kabubut-on sa Dios kita mahimong sakop sa pamilya ni Hesus ug mahimong tinuod nga mga Kristiyanos. Adunay nag-ingon, “The devil doesn’t care if you go to church or read the bible, as long as you don’t apply it to your life.”

FEAST OF SAINT MATTHEW, APOSTLE AND EVANGELIST

MATEO 9:9-13. NGANONG DUOL MAN SI HESUS SA MGA MAKASASALA? Si Hesus wala nakigsuod sa mga makasasala tungod kay nalipay siya sa daotan nilang binuhatan. Gani, ang makasasala nga iyang pasayloon hatagan niya og bag-ong tahas: “Lakaw, ug ayaw na pagpakasala pag-usab.” Si Hesus nakighigala sa mga makasasala tungod kay nalooy siya kanila. Matod pa niya, “Ang mga tawo nga walay sakit wala magkinahanglag doktor, ang masakiton ra.” Ang makasasala usa ka masakiton; aduna kini problema sa iyang kalag, nga kondili tabangan maoy makaingon sa iyang kamatayon nga dayon. Adunay nag-ingon, “A Church is a hospital for sinners, not a museum for saints.” Hinaot nga kining kapistahan ni San Mateo magdasig kanato sa pagbiya sa sala ug pagsunod kang Kristo aron mamaayo kita sa atong pagkamakasasala.