Monday of the 31st Week in Ordinary Time (Year B)

Lukas 14:12-14. Kinsa man ang una natong tabangan sa atong mga kaigsoonan? Si Cristo miingon: “Kon magkombira ka, maoy dapita ang mga kabus, mga bakol, mga piang, ug mga buta, ug mabulahan ka kay dili man sila makabalos kanimo. Baslan ka ra sa Dios inigkabanhaw sa mga matarong.” Gisulti kini ni Jesus dili tungod kay supak siya sa paghimo og kombira uban sa mga higala. Gani, siya mitambong man sa mga hikay nga gipasiugdahan sa iyang mga kahigalaan. Ang iyang tuyo mao ang pagtudlo sa kabililhon sa pagbuhat og maayo ngadto sa uban nga dili magpaabot og balos. Pinaagi ning ebanghelyo kita gidasig sa paghatag og labaw'ng pagtagad sa mga kabus tungod kay gamay lang ang ilang katakos ug dako ang ilang panginahanglan og tabang.

31st Sunday in Ordinary Time (Year B)

Deut 6:2-6; Heb 7:23-28; Mk 12:28-34

Ang magtutudlo sa Balaod nangayo ni Jesus og usa ka sugo – ang labing mahinungdanon sa tanan. Apan si Jesus nihatag kaniya og duha: (1) Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan, ug sa tibuok mong kusog. Ug (2) higugmaa ang imong isigkatawo sama sa imong kaugalingon. Kini nagpakita lamang nga ang duha ka mga sugo dili mahimong bulagon. Konektado kining duha. Walay tinuod nga gugma sa Dios kon wala ang gugma sa silingan. Samtang ang gugma sa silingan dili mahimong lawom ug makahuloganon kon wala ang gugma sa Dios.

Higugmaa ang Dios; higugmaa ang silingan. Gitingob ning duha ka mga sugo ang tanang balaod sa Dios. Gilangkob usab ning duha ang kinatibuk-an sa Kristohanong kaakohan. Higugmaa ang Dios; higugmaa ang silingan. Ingon ani lang kasayon; ingon ani usab kalisod. Sayon sabton, apan lisod buhaton.

Ang gugma sa Dios atong mapadayag sa lain-laing mga paagi: Pagsunod sa Iyang mga kasugoan; Pag-amping ug pag-amoma sa Iyang mga gasa; Paghalad og mga pag-ampo sa pagdayeg ug pagpasalamat; Pagbasa ug pagpamalandong sa Iyang mga Pulong; Pagtambong sa Santos nga Misa ug ubang mga liturhikanhong kalihokan. Kon higugmaon nato ang Dios sa tibuok kasingkasing, kalag, hunahuna, ug kusog, kinahanglan andam kita mohatag Kaniya sa atong panahon, mosabot sa Iyang kabubut-on, ug motuman sa Iyang mga sugo. Nasayod kita nga ang pagbuhat niini dili gyod sayon. Ang trabaho, negosyo, kalingawan, ug mga kalibotanong pangandoy  sa kanunay magbabag sa atong paghigugma sa Dios.

Ang gugma sa silingan nagpasabot nga andam kita motabang, moalalay, magdasig, magpasaylo ug mag-ampo para kang bisan kinsa nga nanginahanglan niini. Sa dihang si Jesus gipangutana “Kinsa man ang akong silingan?” siya mitubag pinaagi sa pagsaysay sa sambingay sa Maayong Samaritano. Atong masabtan sa maong sambingay nga ang silingan wala magpasabot sa mga tawo nga tupad o duol kanato og balay kondili sila nga adunay panginahanglan og tabang. Ang paghigugma sa silingan sama sa kaugalingon dili sayon tungod kay ang atong personal nga kakulangon ug panginahanglan kanunay maghari sa atong kasingkasing ug hunahuna.

Ang paghigugma sa Dios ug sa silingan lisod apan dili imposible nga buhaton. Ang Ginoo naghimo sa matag usa kanato og kasingkasing nga kamao mahigugma ug malooy. Dugang niini, ang mga sakramento maghatag kanato og igong katakos sa pagtuman sa kabubut-on ug kasugoan sa Dios. Ang atong dakong tahas mao lamang ang pagsanong sa inspirasyon ug lihok sa Espiritu sa Dios matag adlaw sa atong kinabuhi.

Human mapabarog ang gamay’ng balay para sa usa ka kabos nga biyuda, nagpasalamat ako sa tanan nga miboluntaryo sa pagtrabaho niini. Kadaghanan kanila mga ordinaryong panday nga libreng mihalad sa ilang katakos, panahon, ug gamit para makatabang og tawo nga sama kanila ordinaryo ug kabos. Ako silang giingnan nga ang ilang gibuhat maoy usa ka pagpakita sa ilang gugma sa Ginoo. Pinaagi niini, ilang gipakita nga sila sama sa Maayong Samaritano, usa ka maayong silingan sa kabos nga biyuda. Pinaagi kanila, ang kabos nga biyuda nakasabot ug nakabati nga siya wala pasagdi, ug nga siya gihigugma sa Ginoo.

Saturday of the 30th Week in Ordinary Time (Year B)

Lukas 14:1, 7-11. Unsa man ang tinuod nga pagpaubos? Karong adlawa gihatagan kita ni Jesus og hulagway sa tawong mapaubsanon. Siya ang tawo nga dili mangandoy sa pagdayeg sa uban. Dili siya makig-ilog sa taas nga hut-ong sa katilingban. Dili siya mamintaha ug maniguro para sa iyang kaugalingon. Ang maong tawo magpaulahi dili tungod kay maglikay siya nga mahago o mapwerhisyo, kondili tungod kay gusto niyang ipahiluna ang uban una sa iyang kaugalingon. Siya ang tawo nga dako atubangan sa Ginoo tungod kay “Ang magpataas ipaubos, ug ang magpaubos ipataas”. Kining ebanghelyo magdasig kanato sa pagpabiling mapaubsanon ug manggihunahunaon sa isigkaingon. Dili kita angay'ng manglupig ug magmapahitas-on tungod kay kini dili Kristohanon. 

All Souls Day

Kaalam 4:7-14; 1 Corinto 15:51-57; Juan 11:21-27

“1 week na lang ang tagal sa imong kinabuhi busa pangandam na”, matud sa doktor.

Nakurat ang pasyente ug miingon, “1 week? Unsaon man nako pagbayad sa akong bayronon nimo dok nga wala naman koy panahon sa pagpangitag kwarta?”

Ug miingon ang doktor, “Kon mao kana, tagalan ta kag 1 month, dili na 1 week.”

Ang “Adlaw sa mga Patay” o “Kalag-kalag” magpahinumdum kanato sa kahamubo sa kinabuhi sa tawo ug magdasig kanato sa pagpangandam alang sa pag-abot sa kamatayon. Adunay kalainan ang panan-aw sa mga kalibutanong tawo ug sa mga magtotoo ni Cristo kalabot ning mga butanga.

Ang kalibutanong hunahuna magtoo nga magdugay ta ning kalibutan. Dasigon kita sama niini: Pagtrabaho og ayo, pagtigum og daghang kwarta, ug pagtukod og dakong balay. Pahimulos sa imong kabatan-on; unya na pagdiniyos kon matigulang na ka. Tagbawa ang imong kaugalingon sa mga butang kalibutanon samtang baskog pa; unya na pagserbisyo sa simbahan kon magretiro na ka.

Adunay kalibutanong hunahuna nga makasabut sa kahamubo sa kinabuhi, apan susama ra ang ilang prinsipyo sa nahiuna. Agnihon kita sama niini: Pahimulos og lingawlingaw kay dili ra ba ka magdugay dinhi sa kalibutan. Suroy, kaon, ug inum sa walay pugongpugong samtang buhi pa ka. Walay pahulay-pahulay; unya na pagpahulay kon patay na ka.

Ang mga tawong kalibutanon mahadlok motan-aw sa umaabut; dili sila ganahan mamalandong sa unsay mahitabo inig katigulang na nila. Labaw silang mahadlok maghunahuna sa adlaw sa ilang kamatayon ug sa unsay mahitabo human niini. Kasagaran, ang mga tawong kalibutanon magpuyo nga mahadlokon, matigulang nga masulub-on, ug mamatay nga walay preparasyon.

Ang mga magtotoo ni Cristo nakasabot nga ang kinabuhi sa tawo gasa sa Dios. Matag adlaw, matag minuto, matag segundo isipon nila nga gasa sa Dios. Ug tungod kay gasa man kini sa Dios, gamiton nila kini sa maayo sumala sa Iyang kabubut-on. Dili nila kini abusaran, dili usab nila kini usikan.

Ang mga magtotoo nakasabot nga ang Dios lamang maoy magbuot asa ug kanus-a ra kita kutob ning kalibutan. Nasayod sila nga ang kinabuhi sa tawo dinhi sa kalibutan mubo ra. Ang 60, 70, o 80 anyos daw kagahapon lang. Nakasabot sila sa giingon sa Balaang Kasulatan: Ang tawo sama sa sagbot, moturok inig kabuntag, mobuswak inig kaudto, ug malawos inig kahapon.

Ang kamubo sa kinabuhi makapabalaka sa tawong kalibutanon, apan dili sa mga tawong matoohon. Ang mga sumusunod ni Cristo nakasabot sa iyang gipamulong: “Ang motoo kanako dili mamatay kondili makabaton sa kinabuhing dayon”. Gihimo ang tawo para makig-uban sa Dios, dili aron magpabilin ning kalibutan. Ang mga magtotoo mangandam dili lang para ning kinabuhia kondili para sa gingharian nga giandam sa Dios alang kanila.

Ang mga magtotoo ni Cristo maghatag og bili sa matag segundo sa ilang kinabuhi. Dili nila usikan ang mga adlaw sa pagpakig-away, pagpakigdumot, ug pagpakigbungol sa mga igsoon ug silingan. Dili nila kawangon ang daghang oras sa pagsugal, pag-inum, ug pagbuhat og daotan. Hinoon, gamiton nila ang matag panahon sa mga butang nga makahuluganon sama sa pag-alagad sa usag-usa, paghigugmaay, pagpinasayloay ug uban pa.

Miabot ang anghel sa kamatayon sa tungang gabii aron kuhaon ang usa ka 50 anyos nga dato. Sa kalisang, ang adunahan midiskarte sa anghel sa kamatayon sa pag-ingon: “Ihatag nako kanimo ang usa ka milyon, pero hatagi sa kog usa ka semana aron ipahiluna ang akong negosyo.” Apan, ang anghel mitubag, “Panahon na nimo, wala na tay mahimo.”

“Ihatag nako ang katunga sa akong katigayonan, hatagi lang kog usa ka adlaw aron makighiuli sa akong mga igsoon nga nakaaway”, nagpakilooy ang negosyante. Apan, ang anghel mitubag, “Panahon na nimo, wala na tay mahimo.”

Unya mihirit pa gyod ang negosyante sa pag-ingon, “Ihatag nako kanimo ang tanan kong bahandi, hatagi lang kog usa ka minuto aron mangayog pasaylo sa Ginoo.” Apan, ang anghel mitubag, “Panahon na nimo, wala na tay mahimo. Let's go!”

Ang tinuod nga mga magtotoo dili maghulat og ugma aron makighiuli sa kaaway. Dili sila maghulat og matigulang para magtinarong. Dili sila maghulat nga masakit para magbag-o sa batasan. Dili sila maghulat nga moretiro para moserbisyo sa Ginoo. Kon duna silay gusto nga buhaton para sa Dios ug sa isigkatawo, himoon nila kini karon, dili ugma pohon.