Friday of the 32nd Week in Ordinary Time (Year B)

Lukas 17:26-37. Unsa may mahitabo sa Adlaw sa Paghukom? Gihulagway ni Jesus ang maong panahon pinaagi sa pag-ingon: “Niadtong gabhiona, may duha ka tawo nga magdulog sa higdaanan; kuhaon ang usa ug ang usa ibilin.” Atong masabot dinhi nga matag tawo manubag sa kaugalingon atubangan sa Ginoo. Dili nato mapasa ang maong responsabilidad ngadto sa lain. Nindot kini nga pahimangno tungod kay adunay daghan kanato nga magpasagad lang ug magsalig nga maluwas tungod sa katarong ug kamaampoon sa ilang mga ginikanan, kapikas, o kaha kaigsoonan. Sayon ra nga moingon, “Iapil lang ko og ampo” o “Ikaw lay pagbinuotan para nako”. Sayop! Sa Adlaw sa Paghukom, ang atong binuhatan maoy susihon, dili ang sa uban.

Thursday of the 32nd Week in Ordinary Time (Year B)

Lukas 17:20-25. Unsa may kahulogan sa mga pulong “Gingharian sa Dios”? Naanad kita sa paghunahuna nga ang Gingharian sa Dios usa ka lugar nga atong makita o maadtoan. Apan ang ebanghelyo karon naghatag kanato og laing pagsabot kalabot niini. Si Jesus miingon: “Ang Gingharian sa Dios dili butang nga inyong makita. Walay makaingon, 'Ania ra!' o, 'Atua ra!'; kay ang Gingharian sa Dios anaa uban kaninyo.” Dinhi atong masabut nga ang Gingharian sa Dios usa diay ka persona, si Cristo mismo, nga atong gipadayon diha sa atong kasingkasing ug sa atong katilingban. Sa atong matinud-anong pagdawat ug pagsunod kang Cristo, atong gitugotan nga Siya ang maghari sa atong kinabuhi. Kon kini ang mahitabo, mahimong realidad ang Gingharian sa Langit dinhi sa Yuta.

Wednesday of the 32nd Week in Ordinary Time (Year B)

Lukas 17:11-19. Makamao ba kita nga magpasalamat sa Ginoo ug sa isigkatawo? Diha sa ebanghelyo giayo ni Jesus ang napulo ka sanglahon nga nagpakilooy kaniya. Apan niining napulo, usa lamang ang mibalik aron sa pagdayeg ug pagpasalamat kang Jesus. Tungod niini nakapangutana ang Ginoo, “Dili ba napulo man ang nangaayo? Hain naman ang siyam?” Bisan kita mobati og kalain sa tawo nga dili makamaong magpasalamat. Isipon nato siya nga walay grado o walay utang kabubut-on. Pero ngano man lage nga sa daghang higayon balewalaon ra man pud nato ang mga butang ug tabang nga atong madawat gikan sa Ginoo ug sa mga tawo? Sa sunod higayon, hinaot nga dili na kita malimot sa pagpasalamat sa Dios ug sa tanan nga nahigugma kanato. 

Tuesday of the 32nd Week in Ordinary Time (Year B)

Lukas 17:7-10. Unsa may atong tumong sa pag-alagad sa Dios? Diha sa ebanghelyo si Jesus miingon: “Kon makabuhat na kamo sa tanan nga gisugo kaninyo, ingna ninyo 'Mga sulugoon kami ug nagbuhat lamang sa among katungdanan.'” Pinaagi ning mga pulong gitudloan kita ni Jesus sa pagsilbi sa Dios nga dili maghulat og balos. Sibo kini nga pahimangno tungod kay daghan kanato magserbisyo o kaha maghatag og donasyon tungod kay adunay pangayoon sa Ginoo. Unya ra ba kon dili ihatag sa Dios ang  gipangayo magmahaymahay kita dayon. Kini magpakita lamang nga ang atong pagpangalagad ug pagtabang sa Simbahan dili kinasingkasing. Ang pag-alagad sa Ginoo ug sa isigkatawo maisip nga bulawanon kon kini atong buhaton nga puno sa gugma ug dili magpabalos.

Monday of the 32nd Week in Ordinary Time (Year B)

Lukas 17:1-6. Unsa may kapaingnan sa daotang panig-ingnan? Sa ebanghelyo si Jesus nagpahimangno sa mga tinun-an sa dili paghatag og daotang ehemplo sa uban. Ang magbuhat sa ingon angay kunong “hiktan ang liog sa usa ka dakong galingang bato ug itambog ngadto sa dagat”. Kining panultihon nagpasabot lamang sa kadako sa sala sa tawo nga maghatag og dili maayong panig-ingnan sa katilingban. Kon magtudlo kita sa usa ka tawo sa pagpakasala, siya magtudlo usab sa laing mga tawo sa pagpakasala, ug kini sila mao na pud ang makaingon sa daghang tawo nga makasala. Busa, dili daotang ehemplo kondili saktong panig-ingnan ang atong ipakita sa uban, ilabi na sa atong mga kabataan, aron adunay maayong kaugmaon ang atong katilingban.