Tuesday of the 4th Week in Ordinary Time (Year C)

Marcos 5:31-43. Unsa may mahimo sa dakong pagtoo? Diha sa ebanghelyo karon adunay duha ka tawo nga naghatag kanato og maayong panig-ingnan sa pagtoo. Ang una mao si Jairo, usa ka pangulo sa sinagoga. Haloyo sa iyang kahalangdon, niduol ug nagpakilooy siya kang Jesus alang sa kaayohan sa iyang anak nga nasakit niadtong tungora. Ang pagkamapaubsanon ni Jairo ug ang iyang dakong pagsalig sa gahum ni Jesus nagdala og kaayohan sa iyang pinalanggang anak. Ang ikaduha mao ang babaye nga gitalinug-an ug nag-antos sulod sa 12 na ka tuig. Alang sa mga doktor wala na siyay purohan nga maayo sa iyang sakit; ug sa mata sa katawhan, siya mahugaw ug makasasala. Apan tungod sa iyang dakong pagtoo ug kaisog nadawat usab niya ang kaayohan gikan sa Dios. 

Monday of the 4th Week in Ordinary Time (Year C)

Marcos 5:1-20. Unsa may kalainan tali sa tawong daotan ug sa maayo? Ang mga daotang espirito nga diha sa tawo'ng giyawaan nagpakilooy kang Jesus nga dili sila sakiton. Gawas niana, wala na silay laing gipangayo. Wala sila mangayo nga mahiusa sa Ginoo. Gani, mas gipili pa nila nga ipadala ngadto sa mga baboy ug malumos sa lanaw. Human ayoha ni Jesus ang tawo nga giyawaan, giayo usab niya ang iyang mga relasyon. “Pauli sa imong kaugalingong katawhan ug sultihi sila unsa kadako ang gihimo sa Ginoo kanimo.” Kining ebanghelyo magpakita sa kalainan tali sa kahimtang sa tawo nga giharian sa yawa ug sa tawo nga nahiusa sa Dios. Ang tawo'ng yawan-on walay makahuloganon nga relasyon; samtang ang tawo'ng diosnon mahiusa sa gugma uban sa isigkaingon.

4th Sunday in Ordinary Time (Year C)

Lucas 4:21-30

Sa ebanghelyo karon nasuko pag-ayo ang mga tawo kang Jesus ug gusto nila siya nga ihagbong sa pangpang. Unsa may ilang gikasuk-an?

Naglagot ang mga tawo kang Jesus tungod kay nagwali siya sa ilang lugar apan wala maghimo’g milagro. Nakadungog sila sa talagsaong gipanghimo ni Jesus sa laing dapit ug gusto nila nga maghimo siya’g mga milagro nga mas labaw pa sa iyang gihimo sa ubang lugar. Tingali naghunahuna sila nga kon tinuod kining tawhana nga gamhanan, angay niyang milagrohan og una ang iyang mga kababayan. (Dili ba Pinoy man sab kini nga panghunahuna?). Apan, para kang Jesus, dili man kini ang sakto’ng kinaiya ug angay’ng pamaagi. Ug gani, nagpasumbingay pa siya nga ang mga propeta, sila si Elias ug Eliseo, niuna pagtabang sa mga hentil, dili sa mga Hudiyo. Tungod niini, nainsulto pag-ayo ang mga Hudiyo nga naminaw kang Jesus.

Si Jesus nakasabot nga ang iyang misyon para sa tanan ug nga dili siya angay’ng magpihigpihig sa iyang pagpangalagad. Bisan ang mga propeta sa Karaang Kasabutan nasayod nga ang gugma sa Ginoo dili lang para sa mga Hudiyo kondili para sa tanan. Pananglitan diha sa unang pagbasa, si Jeremias gipili sa Ginoo aron mahimong propeta sa “mga nasod”, nga sa ato pa, ngadto sa tanang katawhan.

Unsa man ang mga hagit ning ebanghelyo para kanato karon?

Una sa tanan, si Jesus nagdasig kanato sa paghigugma ug pag-alagad sa malangkubong paagi o sa walay pagpilipili. Ang usa ka Kristiyano angay nga maglantaw sa kaayohan sa kadaghanan, dili lang sa mga tawo nga duol sa iyang kinabuhi. Ang tinuod nga gugma andam mogakos sa tanan, dato man o pobre, edukado man o ignorante, matarong man o masalaypon. Ang gugma nga magpihigpihig dili tinuod nga gugma. Nindot kini nga pahimangno para kanato nga adunay mentalidad nga “pang-pamilya” o “pang-pundok” lamang. Ang atong gugma kutob ra sa balay o sa gamay nga katilingban, dili pang-nasud o pang-kalibutan. Tungod niini, pwede nato nga masakripisyo ang kaayohan sa nasud para sa kabulahanan sa atong pamilya o kahigalaan.

Dugang pa niini, si Jesus nag-aghat kanato sa pagbarog o pagsulti sa kamatuoran, bisan pa kon adunay masakitan. Nasayod siya nga sa iyang pagsaway sa linaog nga batasan ug kinaiya sa mga tawo, daghan ang masuko kaniya. Apan bisan pa niini, gisulti niya ang tinuod. Dili bale na kon adunay masakitan o kon siya pagasakiton, basta lamang molutaw ang kamatuoran. Ang kamatuoran ug kaayohan sa tanan maoy angay ipatigbabaw kaysa personal nga interes. Maayo usab kini nga pahimangno tungod kay daghan kanato makaako sa pagtalikod sa maayong prinsipyo aron lamang sa pagdepensa sa personal nga interes. 

Sa usa ka baryo adunay dalan nga apeke ug kurbadahon kaayo. Daghang motorsiklo ug jepney nga depasahero ang maaksidente sa maong dapit. Diha sa iyang mga wali, ang pari kanunay magdasig sa mga tawo nga mahimong “Buotang Samaritano” sa mga mabiktima sa dalan. Tuod man, ang mga tawo abtik nga motabang kon adunay mahitabo sa maong dalan. 

Usa ka adlaw niana, dihay alagad sa Simbahan nga misugyot nga palapdan ang maong dalan aron malikayan ang dugang nga aksidente. Kabahin sa yuta nga makuhaan unta sa pagpalapad sa dalan gipanag-iya sa opisyal sa lungsod, nga nahibaloan nga dili uyon sa maong plano. Ang alagad misugyot sa pari nga maoy paduolon ug pahangyoon sa mayor. Apan ang pari miingon nga dili lang siya manginlabot sa politika. Pagkasunod Domingo, ang pari nagpadayon sa pagdasig sa mga tawo diha sa wali nga motabang sa mga madisgrasya sa kalsada.

Feast of the Presentation of the Lord (Year C)

Lucas 2:22-40. Unsa man ang hagit kanato ning kapistahan sa Paghalad sa Batang Jesus didto sa Templo? Ang ebanghelyo nagsaysay giunsa ni Jose ug Maria pag-adto sa templo aron pagtuman sa Balaod ni Moises nga nagsugo nga ang matag panganay'ng lalaki ihalad sa Ginoo 40 ka adlaw human mahimugso. Sama kang Maria ug Jose, ang mga ginikanan makat-on unta sa paghalad sa ilang anak ngadto sa Dios. Pagkanindot tingali kon madungog sa usa ka bata ang iyang mga ginikanan nga moingon diha sa pag-ampo: “Ginoo, among ihalad Kanimo ang bata nga Imong gihatag kanamo aron mahimo namong anak. Among paningkamotan ang paghatag kaniya og maayong pagtulon-an ug panig-ingnan aron siya mahisama kang Cristo nga motubo sa kusog, kaalam, ug grasya. Amen.”