Monday of the 5th Week in Ordinary Time (Year C)

Marcos 6:53-56. Unsa may lugar sa mga masakiton diha sa kasingkasing ni Cristo? Ang ebanghelyo nagsaysay nga bisan asa si Jesus moadto, dad-on sa mga tawo ang ilang mga masakiton aron Iyang ayohon. Gihatagan ni Jesus og panahon ang mga masakiton, gitugotan sila nga mohikap kaniya ug nangaayo sila. Sa laing higayon, si Jesus mismo ang mihilam sa mga masakiton ug giayo sila niya. Kining buhat sa pag-ayo kabahin gayod sa Maayong Balita nga Iyang gidala ug gusto niya nga ipadayon sa Iyang mga tinun-an: “Lakaw, ug isangyaw ninyo ang balita: ang paghari sa Dios haduol na. Ayoha ninyo ang mga masakiton . . .” (Lucas 7:22). Aron mahimo kitang tinuod nga disipulo ni Cristo, kinahanglan nga magpakita kita og espesyal nga pagtagad sa mga masakiton ug himalatyon.

5th Sunday in Ordinary Time (Year C)

Is 6:1-2, 3-8; 1 Cor 15:1-11; Lk 5:1-11

Karong Domingoha gipahinumduman kita mahitungod sa atong papel diha sa plano sa Ginoo para sa kalibutan. Kitang tanang mga sumusunod ni Kristo, bisan unsa ang atong kahimtang o trabaho, adunay bahin sa ministeryo sa atong Ginoo.

Kasagaran sa mga tawo nga hagiton sa pag-alagad sa Simbahan moingon dayon, “Kamo lang ana brod kay dili ko takos nga mahimong alagad”. Kinsa man gud ang angayan kanato nga mahimong alagad sa Dios? Sa pagkatinuod lang, walay bisan usa kanato nga angayan tungod kay kitang tanan makasasala man. Diha sa unang pagbasa, si propeta Isaias nakakita sa iyang kahugaw ug gusto siya nga mobalibad sa tawag sa Ginoo. Si Pablo usab, sa ikaduhang pagbasa, nasayod nga dili siya angay nga tawgon og apostoles tungod kay gilutos niya ang mga Kristiyano kaniadto. Unya, diha sa ebanghelyo, si Pedro naulaw pag-ayo ug midawat sa iyang pagkamakasasala atubangan ni Kristo. Apan, haloyo sa pagkamakasasala niining tulo, ang Dios naghimo kanila nga magsasangyaw sa gugma sa Dios ngadto sa mga tawo. Pinaagi niini kita gipasabot nga ang grasya sa Dios mas dako pa kaysa atong pagkamakasasala. Si Pablo miingon, “Pinaagi sa grasya ako nahimong ingon ani; ug ang grasya sa Dios dili gayod magkulang o mapakyas.”

“Ayaw nag kabalaka”, si Jesus miingon kang Pedro, “Sugod karon ikaw managat na og mga tawo.”   Ang trabaho nga gisangon kanato ni Kristo mao ang pagpanigop og mga tawo para sa Ginoo. Ang pagpanagat dili sayon nga trabaho. Usahay makakuha ka og daghang isda; usahay usab wala. Ang mangingisda kinahanglan adunay dako nga pasensya; kinahanglan makamao siya nga maghulat. Ingon usab niini ang pagpanagat og mga tawo para sa Dios. Malisod ang pagdala sa mga tawo ngadto sa Simbahan. Dili sayon ang pagkabig kanila ngadto sa Ginoo. Kinahanglan kini og dako nga pasensya. Bisan gani sa atong mga anak maglisod kita sa pagtudlo sa unsay maayo. Kinahanglan nato nga maghatag kanila og igong panahon aron sila makat-on.

Usa ka epektibo nga pamaagi sa mga mangingisda sa ilang pagpanagat mao ang pagdala og mahayag nga lampara. Ang kusog nga kahayag sa lampara mao ang makadani sa mga isda padulong sa pukot sa mananagat. Diha sa pagpanagat og mga tawo, importante usab ang kahayag nga atong dalhon sa atong kinabuhi. Ang kahayag sa maayong binuhatan maoy makadani sa mga tawo sa pagsunod kanato diha sa dalan nga magdala ngadto kang Kristo. Kon wala kanato ang kahayag, kon wala kitay maayong ehemplo, wala usab kitay madala nga tawo ngadto sa Ginoo.

Saturday of the 4th Week in Ordinary Time (Year C)

Marcos 6:30-34. Nganong importante man ang pagpahulay diha sa kahilom? Human sa malampuson nga pagsangyaw, ang mga apostoles giingnan ni Jesus: “Mangadto kita sa dapit nga awaaw aron makapahulay kamog diyotay.” Isip lawasnon, kinahanglan natong hatagan og panahon nga makapahulay ang atong lawas aron maandam sa sunod nga mga buluhaton. Kon dili kita mohunong sa pagtrabaho, dako ang purohan nga magkasakit kita ug maluya. Dugang pa niana, isip espirituhanon, angay usab natong papahulayon ang atong utok ug kasingkasing aron kini makahunahuna ug makabati sa kabubut-on sa Dios. Diha sa kahilom ug sa pag-ampo, atong masinati ang kalinaw ug masabtan ang kagustohan sa Ginoo para sa atong kinabuhi.

Friday of the 4th Week in Ordinary Time (Year C)

Marcos 6:14-29. Aduna ba kitay kaisog sa pagbarog sa kamatuoran? Si Juan gipatay tungod sa iyang pagbarog sa kamatuoran. Iyang giingnan si Hari Herodes nga ang iyang pagpakigpuyo kang Herodias usa ka dakong sala tungod kay kini asawa man sa iyang igsoon. Dili matarong para sa usa ka tawo, bisan og hari siya, ang pagpanapaw. Human sa daghang katuigan, ang espiritu ni Juan nabuhi og balik sa usa ka tawo nga ginganlag Thomas More. Sama kang Juan, gipatay siya tungod sa iyang pagsulti sa tinuod. Dili sakto para kang Hari Henry VIII ang pagpakasal kang Anne Boleyn tungod kay aduna siyay buhing asawa nga si Katerina. Kining ebanghelyo magpahinumdum kanato sa kadaotan sa pagpanapaw ug sa atong katungdanan sa pagsaway ning maong buhat.

Thursday of the 4th Week in Ordinary Time (Year C)

Marcos 6:7-13. Nganong gidid-an man ni Jesus ang mga tinun-an sa pagdala’g daghang butang sa ilang pagsangyaw sa Maayong Balita? Una sa tanan, gusto ni Jesus nga ang magsasangyaw adto mosalig sa panabang sa Dios, dili sa mga butang kalibotanon. Ug ikaduha, buot ni Jesus nga ang mga tinun-an dili madisturbo sa daghang mga butang diha sa ilang pagbuhat sa ilang misyon. Kining ebanghelyo bililhon kaayo nga giya para kanato karon nga buot mopuyo sa Kristohanong kinabuhi. Dili kita angay’ng magpadani sa mga materyal nga butang tungod kay kini dili maghatag kanato’g kasiguroan sa tinuod nga kalipay. Gani, sa daghang higayon ang mga butang kalibotanon mao pay makababag kanato sa pagtuman sa atong buluhaton nga espirituhanon ug diosnon.

Wednesday of the 4th Week in Ordinary Time (Year C)

Marcos 6:1-6. Unsa man ang papel sa mga kabos diha sa katilingban sa Dios? Tungod sa pagka-ordinaryo sa Iyang pamilya ug tungod kay Siya usa lamang ka karpentero, si Jesus wala tuohi sa Iyang tagilungsod. Kining sayop nga batasan anaa gihapon sa atong katawhan karon. Daghan kanato adunay pagpihig sa mga inila, dato ug edukado, apan walay pagsalig sa mga ordinaryong tawo, kabos, ug walay grado. Apan, sa mga mata sa Ginoo, ang tawo dili pagahukman pinaagi sa iyang dungog, bahandi, o edukasyon, kondili pinaagi sa iyang kasingkasing ug gugma. Si Cristo usa ka tinuod nga propeta tungod kay Iyang gidala ang kasingkasing ug gugma sa Dios Amahan. Kita usab, mapobre o madato, adunay bokasyon sa pagkapropeta gikan sa Ginoo ug para sa Iyang katawhan.