11TH SUNDAY IN ORDINARY TIME (YEAR B)

Ez 17:22-24; 2 Cor 5:6-10; Mk 4:26-34

Ning Domingoha, gitudloan kita sa ebanghelyo nga ang Gingharian sa Dios magsugod sa ginagmay'ng mga butang ug makab-ot nato kini sa hinayhinay nga paagi. Pero yuna pa, unsa man diay ang Gingharian sa Dios?

Diha sa ebanghelyo karon, nga sinulat ni San Marcos, si Kristo nagsaysay og duha ka mugbong sambingay: ang sambingay sa Liso nga Nagtubo ug ang sambingay sa Liso sa Mustasa. Pinaagi ning duha ka sambingay atong masabtan nga ang Gingharian sa Dios wala magpasabot og usa ka lugar nga puy-an sa mga tawo. Ang Gingharian sa Dios adunay kalabotan sa usa ka kahimtang sa kinabuhi diin ang kabubut-on sa Dios maoy maghari. Sa ebanghelyo ni San Lucas giingnan ni Hesus ang mga tawo, “Dili dayag ang pag-abot sa Gingharian sa Dios; dili ka makaingon 'Ania dinhi o tua didto,' kay ang Gingharian sa Dios anaa na sa inyong taliwala” (17:21). Sa pagsulti niini, iyang gipasabot ang iyang kaugalingon nga maoy katumanan sa Gingharian sa Dios. Matag adlaw sa iyang pagpakig-uban sa mga tawo, gituman niya ang kabubut-on sa iyang Amahan.

Ang kalambigitan sa Gingharian sa Dios ug sa pagtuman sa Diosnong kabubut-on ato nga makita diha sa pag-ampo nga gitudlo ni Hesus ngadto sa iyang mga tinun-an: “Amahan namo nga anaa sa langit; pagdaygon ang imong ngalan. Muabot kanamo ang imong gingharian, matuman ang imong pagbuot dinhi sa yuta maingon sa langit” (Mateo 6:10). Ang Gingharian sa Dios mahitabo kon ang kabubut-on sa Dios mao na ang gisunod sa mga tawo. Mahimo kining reyalidad sugod dinhi sa yuta.

Ang katukoran sa Gingharian sa Dios magsugod sa ginagmay'ng mga butang – sama sa pagtuman sa sugo sa ginikanan, pag-uli sa sobra nga sukli sa tindahan, pag-amping sa butang nga hinolaman, pagtahod sa tigulang, o kaha sa pagtarong og pagtoon diha sa tulonghaan. Kini sila murag gagmay'ng liso nga atong gisugdan pagtanom sa atong kasingkasing ug kalag. Adunay kamatuoran ang giingon ni Kristo: “Ang tawo nga masaligan sa gagmay'ng butang masaligan usab sa dagko. Samtang ang tawo nga dili matinud-anon sa gagmay'ng butang dili usab magmatinud-anon sa dagko” (Lukas 16:10).

Ang katumanan sa Gingharian sa Dios mahitabo sa hinayhinay ug sa hilom nga paagi. Walay tawo nga mahimong santos sa usa lamang ka pagpamilok. Walay tawo nga mahimong matarong human lang sa usa ka kagabhion. Sama sa gamay'ng liso sa mustasa nga atong gitanom, ang atong pagtuman sa kabubut-on sa Dios hinayhinay nga modako diha sa atong kasingkasing ug mamunga diha sa atong kinabuhi. Mahitabo kini diha sa inadlaw-adlaw natong pagpaningkamot nga mahimong sulondon nga mga anak sa Dios.

Si Manong Pablo usa ka inilang negosyante og karne sa baboy diha sa merkado. Matag adlaw mahurot ang lima ka dagkong inihaw nga baboy pagpalit sa mga tawo. Pinaagi niini, gibuhi niya ang iyang pamilya, ug gipahuman niya og eskuyla ang lima niya ka mga anak. Ako siyang gipanguta, “Unsa may sekreto nimo manong sa maayo nga negosyo?” Ang iyang tubag ingon niini: “Padre, sulod sa daghang katuigan, nagrespeto ug nagmatinud-anon ako sa akong mga kustomer sa tindahan.” Nga sa ato pa, ang iyang inadlaw-adlaw nga pagsunod sa kabubut-on sa Dios nagbunga og maayong kinabuhi para kaniya ug sa iyang pamilya.

MEMORIAL OF THE IMMACULATE HEART OF MARY (YEAR B)

LUKAS 2:41-51. NGANONG SAULOGON MAN ANG KAPISTAHAN SA PUTLI NGA KASINGKASING NI MARIA HUMAN SA PANGILIN SA BALAANG KASINGKASING NI JESUS? Ang kasingkasing sa usa ka inahan konektado sa kasingkasing sa iyang anak. Kon malipay ang anak, malipay usab kaayo ang inahan. Apan kon masakitan ang anak, dili usab matukib ang kasakit nga pagabati-on sa inahan. Mao kini ang kasinatian ni Maria. Sa iyang pagka-inahan sa Anak sa Dios, nahimo siyang kabahin sa tibuok kinabuhi ni Kristo, ilabina didto sa kalbaryo diin ang iyang anak gisakit ug gipatay sa krus. Maingon nato nga si Maria mao ang pinaka-unang disipulo ni Kristo. Siya ang labing unang sumusunod ni Kristo diha sa pagpangalagad ug pagsakripisyo para sa uban. Tungod niini, angay nga pasidunggan sa Simbahan ang Kasingkasing ni Maria uban sa Kasingkasing ni Hesus.

SOLEMNITY OF THE SACRED HEART OF JESUS (YEAR B)

JUAN 19:31-37. UNSA MAN KADAKO ANG GUGMA SA BALAANG KASINGKASING NI HESUS? Sa upat ka ebanghelista, si San Juan ang nagsaysay nga samtang nagbitay sa krus ang patay’ng lawas ni Hesus adunay sundalo nga nidughang sa iyang kilid, ug dihadiha nibuhagay ang dugo ug tubig. Ang pagkatigom sa tubig diha sa palibot sa kasingkasing gitawag og “pericardial effusion” ug ang pagkatigom sa tubig diha sa baga gitawag og “pleural effusuion.” Matod sa mga doktor, mahitabo kini kon ang tawo makasinati og “hypovolemic shock” nga resulta sa daghan ug sakit kaayo nga paglatigo. Ang pagbuhagay sa dugo ug tubig gikan sa kiliran ni Hesus magtudlo kanato sa kadako sa sakripisyo nga iyang gihimo para sa atong kaluwasan. Ang dugo ug tubig nahimong simbolo sa dakong gugma ug kalooy sa Dios para sa Iyang mga makasasalang anak.

THURSDAY OF THE 10TH WEEK IN ORDINARY TIME (YEAR B)

MATEO 5:20-26. UNSA MAN NGA MATANG SA KATARONG ANG DALAYGON SA DIOS? Ang katarong sa mga magtutudlo sa Balaod ug mga Pariseo ilang gipakita pinaagi sa pagbuhat sa mga tulumanon nga gisugo sa Balaod sama sa pagdala’g halad ngadto sa templo. Maayo kini, apan dili igo. Si Hesus miingon: “Inigdala nimo sa imong halad sa Dios... ug didto mahinumdum ka nga nasilo ang imong isigkatawo, biyai ang imong halad atubangan sa halaran, ug pakig-uli una kaniya. Unya balik sa halaran ug ihalad ang imong halad sa Dios.” Para ni Hesus, ang tinuod nga katarong magsugod diha sa kasingkasing sa tawo. Ang atong pag-ampo ug pagsimba mahimong bililhon kon kini ubanan sa kasingkasing nga mahigugmaon ug maloloy-on. Ang Panultihon 15:29 nag-ingon: “The Lord is far from the wicked. But He hears the prayer of the righteous.”

WEDNESDAY OF THE 10TH WEEK IN ORDINARY TIME (YEAR B)

MATEO 5:17-19. UNSAON MAN NATO PAGTAGAD ANG MGA BALAOD? Si Kristo nagtahod sa mga balaod ug andam siya nga mosunod niini subay sa ilang espiritu. Sa atong katilingban ug Simbahan karon adunay mga balaod nga gipahiluna alang sa kaayohan sa tanan. Isip mga sakop, kita adunay obligasyon sa pagsunod niini kutob sa atong mahimo. Ang pagtuman sa mga balaod, bisan sa pinakagamay niini, maoy usa ka pagpakita sa atong gugma sa Ginoo ug sa isigkatawo. Gani, ang ebanghelyo nag-awhag kanato dili lamang sa pagsunod sa balaod kondili sa pagtudlo usab niini ngadto sa uban. Ang maghimo niini, matod ni Kristo, “pagatawgon nga dako sa gingharian sa langit.” Sa pagtudlo, hinumduman nato ang giingon ni W.A. Ward: “The mediocre teacher tells. The good teacher explains. The superior teacher demonstrates. The great teacher inspires.”

TUESDAY OF THE 10TH WEEK IN ORDINARY TIME (YEAR B)

MATEO 5:13-16. UNSA MAY PAPEL SA MGA KRISTIYANO DINHI SA KALIBOTAN? Si Hesus migamit og duha ka hulagway: asin ug kahayag. Ang asin maoy maghatag og kalami sa pagkaon ug magpaluntad niini. Sama sa asin, ang mga Kristiyano gilaoman ni Hesus nga maghimo sa kalibotan nga mas nindot puy-an pinaagi sa paghigugma ug pag-alagad sa usag-usa. Ang kahayag usa usab ka bililhon nga elemento. Kon wala kini, ang mga tawo magkabanggaay, mangahagbong sa kanal, ug dili makaabot sa ilang padulngan. Sama sa kahayag, ang mga Kristiyano giawhag ni Hesus nga maghatag og lamdag sa katilingban pinaagi sa ilang maayong panig-ingnan. Si Nelson Mandela nag-ingon: “We can change the world and make it a better place. It is in our hands to make a difference.”