MONDAY OF THE 1ST WEEK OF LENT (YEAR B)

MATEO 25:31-46. Unsa may mensahe sa sambingay sa “Katapusang Paghukom”? Ang maong sambingay naghatag kanato’g dakong rason nganong angayng higugmaon ang isigkaingon, ilabina ang mga kabos. Ang Dios nga Hari miingon: “Sultihan ko kamo nga bisan unsay inyong buhaton ning ubos kong mga igsoon, inyo kining gibuhat kanako”. Atong masabtan sa sambingay nga ang pagtabang sa uban makaayo dili lamang sa mga kabos kondili sa ato usab nga kalag. Diha sa pagtubag sa panginahanglan sa uban, atong maangkon ang kaluwasan. Busa, dili nato angayng baliwalaon ang mga kabos nga atong mahinagbo matag karon ug unya. Inigkagabii, sa dili pa kita matulog, tan-awon nato ang atong kaugalingon diha sa salamin ug pangutan-on, “Unsa may nahimo nimo karong adlawa para sa mga kabos mong igsoon?”

1ST SUNDAY OF LENT (B)

MARCOS 1:12-15. Unsaon man nato pagpakigbatok ang mga pagtintal sa yawa? Ang yawa makamaong mogamit og panagway nga maanyag ug mga butang nga makasilaw. Matod pa, “Sin fascinates before it assasinates.” Daghan ang malingaw sa pagdasig ni Satanas ug mahitumpawak na hinoon sa kaparotan. Apan, ang Maayong Balita karon mao kini: Si Kristo nagmadaogon batok sa mga tintasyon sa yawa ug walay nahimo si Satanas kaniya. Kini maoy maghatag kanato’g dakong kadasig. Makaya nato ang pagpakigbatok ni Satanas kon kita motugyan sa atong kaugalingon ngadto kang Kristo. “The best way to escape temptation is to run to God.”Matag adlaw, gikan sa buntag hangtod sa kagabhion, ang yawa molihok sa pagtintal kanato. Busa, makig-uban gayod kita kang Kristo sa matag higayon ug sa matag butang nga atong buhaton.

1ST SUNDAY OF LENT (YEAR B)

Gen 9:8-15; 1 Pet 3:18-22; Mk 1:12-15

Niadtong nilabay nga Mierkoles nagsugod ang panahon sa kwaresma. Gihimo nato ang pagpamadlis og abo sa agtang agi’g pagpakita sa pagdawat nato sa atong pagkatawhanon ug sa atong determinasyon nga maghinulsol sa atong mga kasal-anan. Kita tawo lamang, huyang ug dali madani sa kadaotan. Apan, nagpabilin kitang masaligon nga inubanan sa panabang sa Dios, mabuntog nato ang gahum sa yawa ug mabiyaan ang sala.

Ang labing dakong tumong sa kwaresma mao ang paghimo og espiritwal nga pagpangandam alang sa kasaulogan sa paghalad ni Kristo sa iyang kinabuhi ug sa iyang madaugong pagkabanhaw. Ang mga pagbasa niadtong Mierkoles Badlis nagpahinumdum kanato sa mga naandan nga gimbuhaton sa panahon sa kwaresma: matinud-anong pag-ampo, pagpuasa o pagsakripisyo, ug pagtabang sa mga kabos. Kining tulo maoy giisip nga labing lig-on nga pangkontra sa tintasyon sa yawa.

Motuo ba kamo nga adunay yawa? Ang pulong nga “Satanas” (satan'el in Hebrew) o “Diyablo” (diabolos in Greek) nagpasabut og kaaway. Si Satanas mao ang kaaway nga magdala sa tawo ngadto sa kaalaotan. Ang ebanghelyo nagsaysay kanato nga si Kristo gitintal ni Satanas didto sa kamingawan sulod sa kwarenta ka adlaw. Apan nagpabilin siya nga malig-on ug ang mga anghel sa Dios nitabang kaniya.

Bisan tuod dili nato makita si Satanas, atong mabati nga siya nagalihok gayod aron kita mahilayo sa Dios. Sugod sa sayong kabuntagon hangtod sa lawom nga kagabhion, kapila man nato masinati ang lihok ug pagtintal sa yawa? Nadungog mo ba siya sa dihang siya niingon: “Duol ngadto sa imong mga silingan nga nagtapok kay nindot ang tsismis didto.” “Daota ang imong isigka-trabahante aron madaot ang iyang pangalan ug ikaw nay ipuli sa iyang taas nga posisyon.” “Unaha ang imong kaugalingon kay basin maalkanse ka.” “Pagkodigo aron modako ang imong grado.” “Panikas sa negosyo aron madato ka.” “Pangabit aron ilhon ka nga tinuod nga lalaki.” “Gawas lang og una sa opisina. Dili bitaw ka mahinungan.” “Inum og daghan samtang nia pa ka sa kalibutan. Sa langit wala nay beer.” “Ayaw kahadlok mangawat sa kwarta sa gobyerno kay daghan man mo naghimo ana.” “Palit og mahalon nga butang aron daygon ka sa mga tawo.” “Unya na lang pagtarong sa imong kinabuhi kon matigulang naka. Pasayloon bitaw ka sa Dios.” Ang mga pulong sa yawa nindot apan makadaot.

“Ayaw lang gayod patintal.” Nasayod kita nga sayon lang ni isulti, apan lisud buhaton. Ang yawa makamao mogamit og panagway nga maanyag, lawas nga makadani, ug mga butang nga makasilaw. Ug sumala sa atong kasinatian, dili sayon ang pagbalibad sa tintasyon ni Satanas. Apan, ang maayong balita sa ebanghelyo para kanato karon mao kini: Si Kristo nagmadaugon batok sa mga tintasyon sa yawa. Walay nahimo kaniya si Satanas! Tungod niini, kita nahatagan og dakong kadasig ug kaisog. Inubanan ni Kristo, aduna kitay katakos nga magdumili sa tintasyon sa yawa ug magmadaogon batok sa gahum ni Satanas.

Niining panahon sa kwaresma, moduol kita sa sakramento sa kompisal ug ihalad nato ang atong mga sala ngadto ni Kristo. Uban sa pagpasaylo sa Ginoo, madawat usab nato ang dugang grasya ug kusog nga mao unyay atong gamiton sa pagpakigbatok sa yawa.

SATURDAY AFTER ASH WEDNESDAY (YEAR B)

LUKAS 5:27-32. Kinsa man ang mas bulahan, ang makasasala ba o ang matarong? Sa pag-ingon ni Kristo, “Gitawag ko ang mga makasasala, dili ang mga matarong”, wala niya ipasabot nga mas pinangga niya ang mga masalaypon kaysa mga buotan. Ang mga matarong gimahal pag-ayo sa Dios. Apan, gusto usab niyang luwason ang mga makasasala. Sila ang nanginahanglan og doktor ug sila ang hinungdan sa pag-anhi ni Kristo. Ang mga makasasala nga modawat sa ilang sayop ug mobiya sa daotang kinabuhi aron pagsunod kang Kristo maoy makaangkon og kaluwasan. Mao kini ang nahitabo kang Levi, Zakeo, Maria Magdalena, ug uban pa. Apan ang mga tawo nga nagtoo nga sila walay sala, sama sa mga Pariseo, mao na hinoon ang dili maluwas. Sakto ang panultihon, “A humble sinner is better than a self-righteous saint”.

FRIDAY AFTER ASH WEDNESDAY (YEAR B)

MATEO 9:14-15. Unsa man kabililhon ang pagpuasa? Ang pagpuasa usa ka dalaygong buhat, ilabina kon kini himoon uban sa maayong katuyoan ug dili pakitang-tao lamang. Ang pagpuasa mao ang pagdisiplina sa kaugalingon pinaagi sa pagdumili sa pagkaon, pag-inum, o paglingawlingaw. Mahimo kining makahuloganon kon ubanan sa mga buhat sa kalooy, sama sa pagpaambit og pagkaon sa gigutom, paghatag og kasilongan sa mga kabos, ug paglihok para sa hustisya ug kaangayan (Is 58:6-7). Diha sa ebanghelyo gipasabot ni Kristo nga adunay saktong panahon alang sa pagpuasa. Ug para kanatong mga Katoliko, ang Kwaresma maoy labing sakto nga kahigayonan sa paghimo niini. Makighiusa kita ni Kristo diha sa iyang paghigugma, pagpangalagad ug pagsakripisyo alang sa kinabuhi ug kahamugaway sa mga kabos ug sinalikway.

THURSDAY AFTER ASH WEDNESDAY (YEAR B)

LUKAS 9:22-25. Kinabuhi ba o kamatayon ang atong pili-on? Sa unang pagbasa, si Moises nagtudlo nga kon atong higugmaon ang Dios ug sundon ang iyang mga sugo, makabaton kitag kinabuhi ug kausawagan (Deut 30:15-20). Apan subo palandungon nga karong panahona daghang mga tawo ang mopili sa kamatayon – magpuyo nga walay Dios, makigdumot, maglinaog, manglibak, manikas, magbudhi, ug ang uban, mangaway ug mopatay. Isip mga sumusunod ni Kristo, angay kitang mokontra sa daotang espiritu sa katilingban. Dili kalaog kondili pagkalimot sa kaugalingon ang atong sundon. Dili pahayahay ug pagpakasayon kondili pagpas-an sa krus ug katungdanan ang atong puy-an. Kini ang dalan nga gilaktan ni Hesus, dalan sa gugma ug kalooy, nga maoy maghatag kanato’g kinabuhi nga malipayon.