MATEO 15:21-28. Maluwas ba ang tawo bisan dili siya
Katoliko o lahi ang iyang tinuohan? Sa unang pagbasa (Isaias 56:1, 6-7), gipadayag sa
Dios nga ang Iyang balay pagatawgon og Balay Alampoanan para sa tanang mga
tawo. Kini nagpasabot nga ang tanang binuhat adunay luna sa kasingkasing sa
Dios. Sa ikaduhang pagbasa (Roma 11:13-15, 29-32), si San Pablo nagpadayag nga
bisan ang mga hentil nga wala moila sa Dios makaangkon og kaluwasan tungod sa Diosnong
kalooy. Unya, diha sa ebanghelyo, si Kristo mismo mipakita nga ang Dios maluoy
gayod sa tanan nga moduol ug mosangpit kaniya. Iyang gihatag ang gipangayo sa usa
ka inahan nga hentil nga nangaliyupo para sa kaayohan sa iyang anak nga
masakiton. Atong masabtan dinhi nga ang kaluwasan dili lamang iya sa mga Katoliko
kondili alang sa tanan nga buot luwason sa Ginoo.
