Is 22:19-23; Rom 11:33-36;
Mt 16:13-20
Nakaila
ba ako ni Manny Paquiao? Nakita ko na siya sa TV ug aduna akoy nahibaloan
mahitungod kaniya. Usa siya ka inila nga boksingero, idolo ug garbo sa tanang
mga Pilipino. Apan, nakaila ba ako kaniya? Moingon ako nga wala pa.
Ang
pag-ila og usa ka tawo manginahanglan og igong panahon. Kinahanglan mauban nimo
siya sa pagpuyo, pagtrabaho, pag-eskuyla o kaha pagdula. Aduna akoy nasayran
mahitungod kang Manny Paquiao, apan wala ako makaila sa tinuoray kaniya kay
wala man kami magkauban sukad-masukad.
Dinhi
nato masabtan ang kalainan sa duha ka pangutana ni Kristo ngadto sa iyang mga
tinun-an: “Matud sa mga tawo kinsa man ako?” ug “Para kaninyo kinsa man
ako?” Sa unang pangutana, gusto ni
Kristo masayran gikan sa mga tinun-an kon unsa man ang ilang nadungog o
nahibalo-an mahitungod kaniya. Pero sa ikaduha, gusto ni Kristo masayran kon
ang iyang mga tinun-an nakaila ba gyod kaniya?
Mas
mahinungdanon ang ikaduhang pangutana tungod kay kini magpakita kon unsa kalawom
ang pag-ila sa mga tinun-an kang Kristo. Pinaagi sa maong pangutana, masayran
kon ang mga tinun-an aduna bay personal nga relasyon o pakighigalaay uban ni
Kristo. Atong masabtan dinhi nga si Kristo wala mag-apas sa kahibalo sa mga
tinun-an kondili sa ilang mainitong pakiglambigit kaniya.
Ning
Dominggoha, kita gihagit nga motubag usab sa pangutana ni Kristo, “Para kaninyo
kinsa man ako?” Posible nga daghan na kita’g nahibalo-an mahitungod kang Kristo
gikan sa atong mga ginikanan, mga magtutudlo, mga katekista ug mga pari. Apan ang
pangutana: Nakaila na ba gyod kita kaniya? Nahibalo na ba kita unsa ang iyang
papel sa atong kinabuhi? Nasayud ba kita kon unsa ang iyang kabubut-on para
kanato? Nahibalo ba kita sa iyang mga pagbati?
Mailhan
lamang nato sa tinuoray si Kristo kon kita mogahin gyod og panahon sa
pagpakig-uban ug pagpakighinabi kaniya diha sa pag-ampo. Sa dihang mitubag si
Pedro “Ikaw ang Mesiyas, ang Anak sa Dios nga buhi!”, midason si Kristo sa
pag-ingon “Bulahan ka Simon tungod kay kining butanga gipadayag kanimo sa
Amahan nga atua sa langit.” Nga sa ato pa, ang tanang kahibalo magagikan dili
sa tawhanong abilidad kondili sa Dios nga Makagagahum. Angay gyod nga
magmakanunayon kita sa pag-ampo ug pagpamalandong tungod kay pinaagi niini
mailhan nato si Kristo ug mahibalo-an nato ang iyang kabubut-on.
Importante
kaayo nga aduna kitay maayo nga pag-ila ni Kristo tungod kay kini adunay dakong
implikasyon sa pag-ila nato sa atong kaugalingon. Pananglitan, kon para kanato
si Kristo usa ka maisog nga agalon, dako ang puruhan nga mobati kita nga ulipon
lamang ug magpabiling mahadlokon kaniya. Apan kon makasabut na kita sa iyang
giingon nga siya atong igsoon ug nga siya usa ka “maayong magbalantay sa
karnero”, kita mobati nga mga anak sa Dios ug magpabiling masaligon sa Diosnong
gugma ug panabang.
Ang
saktong pag-ila ni Kristo aduna usay implikasyon sa pagsabut nato sa atong
bokasyon. Gipakita kanato sa Ebanghelyo nga ang tawag sa pagkapangulo sa
Simbahan gihatag ni Kristo kang Pedro sa dihang iyang nasuta nga sakto ang
pag-ila sa tinun-an kaniya. Para kang Pedro, si Kristo mao ang dugay nang
gipaabut nga Manluluwas, ang katumanan sa Diosnong panaad. Kining kamatuoran
bililhon kaayo para kang Pedro tungod kay siya mismo nasayod sa iyang
pagkamasalaypon ug sa iyang dakong panginahanglan og usa ka Manluluwas. Ug
nindot kaayo palandungon nga sa pagtawag ni Kristo kang Pedro nga mahimong
pangulo sa Simbahan, iya usab nga gihatag kaniya ang dakong tahas sa paghatag
og pasaylo ngadto sa tanang makasasala.
Hinaot
unta nga sa pag-ila nato kang Kristo isip atong igsoon ug manunubos, ato usab
nga dawaton ang iyang tawag kanato sa pagpuyo isip mga anak sa Dios ug sa
pagsangyaw sa Maayong Balita sa kaluwasan ngadto sa tanang katawhan.
