MATEO 19:23-30. Unsa may buhaton
sa mga dato aron makasulod sa Gingharian sa Langit? Una, ang mga dato angay'ng
magbantay nga dili mahimong ulipon sa bahandi. Dili nila angay'ng hutdon ang
ilang panahon ug kusog sa pagpangita’g kwarta. Angay silang maghatag og panahon
sa pagpalambo sa ilang espirituhanong kinabuhi, ilabina sa ilang relasyon uban
sa Dios ug sa isigkaingon. Ikaduha, ang mga dato angay’ng magbantay nga dili
mahimong laug. Kinahanglan nga makat-on sila sa pagpaambit sa ilang bahandi
ngadto sa uban, ilabina sa mga kabos ug may panginahanglan. Ug ikatulo, ang mga
dato kinahanglan adto mosalig sa Ginoo, dili sa ilang bahandi. Sayran nila nga
ang labing nindot nga mga butang dili mabayran og salapi, apil niini ang gugma,
kaluwasan ug kinabuhing dayon nga sa Dios lamang magagikan.
