MATEO 22:1-14. Unsa
man nga bisti ang atong isul-ob sa pagtambong sa kombira sa Dios? Ang
Kristohanong kinabuhi gihulagway sa sambingay isip usa ka dakong kombira sa
kasal. Ang Dios Amahan mao ang hari nga nagdapit og mga tawo nga motambong sa
kasal sa Iyang Anak nga mao si Kristo. Ang atong pag-apil sa maong kombira
ikalipay pag-ayo sa Hari; ang atong pagbalibad maghatag kaniya’g dakong kasubo.
Kon kita moduyog sa kombira, gilaoman kita nga magsul-ob og saktong
bisti. Ang bisti nga gipasabot dinhi dili materyal kondili espiritwal. Ang
“bisti sa kasal” para kanato mao ang mga mithi sa ebanghelyo sama sa kaayo, kamaki-angayon,
kamanggihatagon ug kamanggiloloy-on. Kon wala kita ning mga mithi, wala kitay
luna sa kombira sa Dios ug dili nato masinati ang kalipay sa pagpakig-uban sa
Kristohanong katilingban.
