MATEO 16:13-20. Asa
man magagikan ang tanang gahum dinhi sa yuta? Daghan ang maghunahuna nga ang
gahum sa tawo magagikan sa iyang bahandi, kaalam, o kaha sa posisyon nga
gihawiran. Apan ning Domingoha, gipahinumduman kita nga ang tanang gahum magagikan
sa Dios. Ang unang pagbasa (Is. 22:15, 19-23) nagpakita sa katungod sa Dios sa
pagpalagpot og abusadong tinugyanan ug sa pagtudlo og pangulo nga ginganla’g Eliakim,
usa ka tawo nga mapaubsanon ug maalagaron. Diha sa ebanghelyo, ang Ginoong
Jesus maoy naghatag kang Pedro og gahum sa pagdumala sa Simbahan ug kaniya usab
gihatag ang yawi sa Gingharian sa Langit. Kini magpahinumdum sa tanang
opisyales sa gobyerno ug sa simbahan nga ang ilang gahum gipahulaman lamang sa
Dios ug angay nilang gamiton sa maayong pagpangalagad, dili sa pag-abuso, sa
katawhan.
