MATEO 14:22-36. Kinsa may
maghatag kanato’g kusog ug kaisog panahon sa mga kalisod? Ubos sa pagmando ni
Jesus, si Pedro nakalakaw sa tubig taliwala sa kusog nga unos ug dagkong mga
balod. Apan wala madugay si Pedro nisugod sa pag-unlod. Ngano man? Kini tungod
kay ang atensyon ni Pedro nibiya kang Jesus ug didto na napunting sa nagpungasi
nga hangin ug mga balod. Niunlod si Pedro sa dihang siya giharian na dili sa
pagsalig kondili sa kahadlok. Ingon usab niini ang mahitabo sa atong kinabuhi.
Kon magpabilin kita diha sa Dios, walay bagyo nga makapaunlod kanato. Kon hugot
ang atong pagsalig sa iyang panabang, walay problema nga dili nato mapas-an.
Apan kon mawad-an kita’g pagsalig, o kon makalimot kita nga kontrolado sa Dios
ang tanan, mounlod usab kita sa atong nahimutangan.
