FRIDAY OF THE 18TH WEEK IN ORDINARY TIME (YEAR A)

MATEO 16:24-28. Unsa may mahitabo sa tawo nga dili maantigong modumili sa kaugalingong kailibgon? Ang kalaog nahimong kabahin sa samarang kinaiyahan sa tawo human matintal si Adan ug si Eba. Tungod kay kini dili man apil sa unang plano sa Dios, ang kalaog magdala’g kadaot sa tawo. Pananglitan, ang tawo nga magpalabi’g kaon og pagkaon nga tam-is, parat, o kaha mantikaon sa kadugayan maluya ug masakit. Ang tawo nga magpatuyang og inum masakit usab. Aron mahimsog ang lawas ug kalag, kinahanglan nato ang pagdisiplina sa kaugalingon. Angay kitang makat-on sa pagdumili sa atong mga kailibgon. Gani, ang atong relasyon sa Ginoo ug sa isigkatawo madaot usab kon kita laog kaayo. Kon ang kaugalingon ra ang atong gihunahuna, mawad-an kita’g gugma ug panahon para sa Dios ug sa isigkaingon.